Улуустааҕы Тыа хаһаайыстыбатын управлениетын начаалынньыга Инна Яковлева иһитиннэрбитинэн, Өймөкөөн улууһугар быйылгы дьылга оттооһун былаана 3200 туонна этэ.
Инна Семеновна улууска оттооһун былаана 78,5 % туолла диэн сырдатта. Ол эбэтэр улуус отчуттара сайын устата холбоон 2510,9 туонна оту бэлэмнээтилэр. Быйыл Төрүт нэһилиэгин эҥэр халааннаан, тыа сирин дьонун олоҕор-дьаһаҕар улахан мэһэйи үөскэппитэ биллэр. Төрүттэр бу сайын, дьиҥэр, 220 туонна оту охсон хаһааныахтаахтара кыаллыбакка, манна аграрийдар 150 туонна оту бэлэмнээн, былаан 68,2 бырыһыан туолла. Онон бу нэһилиэккэ ааспыт сылтан хаалбыт отторун уонна кыһыҥҥы суол турдаҕына улууска тиэйиллиэхтээх сүөһү эбии аһылыгын (комбикорм, эбиэс) көмөтүнэн кыстыгы туоруур соруктаахтар.
— Улуус үрдүнэн хаһаайыстыбалаах дьону комбикорманан уонна эбиэһинэн хааччыйыы дьон тус сайаапкатынан олохтоох бүддьүөт суотугар оҥоһуллар. Сүөһү бу эбии аһылыга Саҥа дьыл кэнниттэн тиэрдиллиэҕэ. Урукку дьылларга курдук өрөспүүбүлүкэ өттүттэн отунан көмө оҥоһуллубат диэн нэһилиэнньэ өйдүөн наада, — диэн тоһоҕолоон бэлиэтээтэ Инна Яковлева.
Бу туһунан сиһилии “Хотугу сардаҥа” хаһыакка ааҕыҥ.
Хаартыска: Семен Сивцев-Өймөкөөн Сэмэнэ
Любовь Кривошапкина