Сылгыһыт И. Новгородовы кытта сибээстэһэн, бу туһунан улуустааҕы хаһыакка сырдатарыгар көрдөстө:
— Мин Өймөкөөн улууһун Биэрэк Үрдэ учаастагыттан төрүттээхпин. 2004 сыллаахтан Дягилевтар хаһаайыстыбаларыгар сылгыһытынан үлэлиибин. 2023 сыллаахха Тыа хаһаайыстыбатын туйгуна ааты ылан турардаахпын. Аны быйыл РФ Махтал суругун тутан үөрүүм муҥура суох. Бу соторутааҕыта бааһынай хаһаайыстыба салайааччыта Тарас Дягилевтыын Алтайга сынньанан, доруобуйабытын бөҕөргөтөн кэллибит. Бэрткэ сынньанныбыт, күүс-уох эбиннибит.
Мин сылгыны олус таптыыбын, убаастыыбын. Сылгыны үөрдээн иитии – саха омук төрүт дьарыга уонна киэн туттуута. Кыһын томороон тымныыга, сайын өҥүрүк куйааска аһаҕас халлаан анныгар сылдьан сыралаһар тыа сирин туруу үлэһиттэрэ, биир идэлээхтэрим — сылгыһыттар дии саныыбын.
Оттон салайааччы Тарас Дягилев Иннокентий Иннокентьевич туһунан маннык кэпсиир:
— Иннокентий Иннокентьевичтыын ыкса 2004 сыллаахтан үлэлиибит. Кини ол саҕана “Өймөкөөн” сопхуос эстээтин кытта, аҕам Тимофей Тимофеевич Дягилев бааһынай хаһаайыстыбатын тэринэн саҕалаабытыгар, киниэхэ үлэлии кэлбитэ. Оччолорго “Сайылык” диэн сиргэ база тэриммиппит. Мин аҕам дьыалатын салҕаан, хаһаайыстыбаны 2014 с. салайабын. Иннокентий олус эппиэтинэстээх, туруу үлэһит киһи, киэн туттар үлэһитим. Сылгыларга сыһыана сымнаҕас, кинилэрдиин биир тылы булар ураты дьоҕурдаах.
Сылгыны көрүү-истии – улахан сатабылы, толкуйу эрэйэр. Бу — олус түбүктээх үлэ. Иннокентий Иннокентьевич сыралаах үлэтин сыаналаан наҕараадаҕа түһэрбитим. Ол курдук 2023 с. киниэхэ Тыа хаһаайыстыбатын туйгуна ааты иҥэрэри эккирэтиһэн туран ситиспитим. Быйыл Арассыыйа тыа хаһаайыстыбатын министиэристибэтин Махтал суругун тутарыгар үлэлэстим. Мин үлэлэригэр бэриниилээх, эппиэтиэстээх дьоммунан олус киэн туттабын, кыаҕым баарынан өйүүргэ кыһаллабын.
Мин быйыл СӨ Тыа хаһаайыстыбатын министиэристибэтэ курортка эмтэниигэ тэрийэр куонкуруһугар кыттан кыайбытым. Онон аан бастакыбытын үһүө буолан – Иннокентий Новгородов, Евгений Атастыров уонна мин — Алтай өрөспүүбүлүкэтигэр санаторийга сынньанан кэллибит, доруобуйабытын бөҕөрҕөттүбүт.
Өбүгэбит үгэһин тутуһан, тыйыс айылҕаны кытта туруулаһан, сылгы иитиитигэр олоҕун анаабыт киһи хайҕалга эрэ сылдьар. Сылгыны иитэр, көрөр-истэр эр бэртэригэр өссө да үрдүк ситиһиини баҕарабыт!
Ольга Скрыбыкина