Ааспыт нэдиэлэҕэ Нерюнгрига өрөспүүбүлүкэ биир бэлиэ тэрээһинэ – Олоҥхо Ыһыаҕа ыытыллыбыта. Өймөкөөн улууһуттан “Ытык хайалар туралларын тухары, аан дойду эстиэ суоҕа” диэн тосхолунан барбыт ыһыахха 23 киһилээх дэлэгээссийэ кыттыбыта.
Ыһыах иитинэн ыытыллыбыт куонкурустарга улуус 18 талааннаах дьоно-сэргэтэ кыаҕа баарынан кыттан, улуустарын ааттаппыттара.
Норуот маастара, Уус-Ньара бөһүөлэгин олохтооҕо Тамара Федорова тэрээһин кэнниттэн санаатын маннык үллэһиннэ:
— Олоҥхо Ыһыаҕар араас маастардар тиийэн, киһи эрэ кэрэхсиир, сэргии көрөр үлэлэрэ үгүс этэ. Мин ордук хоту улуустар оҥоһуктарын сэҥээрдим.
Биһиэхэ быыстапкаҕа анаан миэстэ бэлэмнээбиттэр этэ. Онно илдьэ тиийбит араас оҥоһуктарбытын – оҕуруонан суумкалары, илин, кэлин кэбиһэрдээх аныгылыы моһуоннаах курдары о.д.а. дьон көрүүтүгэр тэлгэппиппит. Манна Уус-Ньаратааҕы “Пегас” Оҕо киинин үлэһиттэрин Антонина Аярова, Вера Федорова уонна мин үлэлэрбин билиһиннэрбиппит. Итини тэҥэ араас улуустар уран тарбахтаахтарын маастар-кылаастарыгар сылдьан дуоһуйдубут, үтүө уопуттарыттан үллэстибиттэрин биһирээтибит.
— Мин ыһыах кэмигэр ыалдьыттары көрсүбүт волонтер оҕолору олус хайгыы көрдүм. Кинилэр киһи туохха наадыйарын барытын оҥорон иһэллэр. Дьону-сэргэни кытта истиҥник сэһэргэһэллэр, ыһыаҕы төһө сөбүлээтигит диэн сураһаллар, хантан кэлэ сылдьарбытын эйэҕэстик интэриэһиргииллэр, — диэн кэпсээтэ Тамара Егоровна. – Кымыстарын олус сөбүлээтим, үтэһэлээх этинэн босхо күндүлээбиттэрэ. Киһи муммат курдук, туох-ханна баарын ыйар бэлиэлэр сир аайы бааллара кэрэхсэттэ.
Ити курдук улуус кииниттэн тус бэйэлэрэ Нерюнгрига анаан ыһыахтыы тиийбит “Далбар” ситим атын кыттыылаахтара эмиэ тэрээһини сэҥээрбиттэрин, үтүө уопут атастаһан кэлбиттэрин туһунан үөрэ-көтө этэллэр.
Бу туһунан “Хотугу сардаҥа” хаһыакка ааҕыҥ.
Любовь Кривошапкина