От ыйын 4-5 күннэригэр Нерюнгри оройуонугар аан бастаан өрөспүүбүлүкэтээҕи Олоҥхо Ыһыаҕа ыытыллыаҕа.
Суолталаах тэрээһин «Ытык хайалар туралларын тухары, аан дойду эстиэ суоҕа» («Пока cтоят священные горы – мир не рухнет») тосхолунан барар. Олоҥхо ыһыаҕа Нерюнгри куорат 50 сыллаах үбүлүөйүгэр, ону тэҥэ Аҕа дойду Улуу сэриитигэр Кыайыы 80 сыллаах үбүлүөйдээх сылыгар ананан ыытыллыаҕа. Бырагыраамаҕа 70-тан тахса тэрээһин, ол иһигэр 40 күрэхтэһии киирэр.
Бу күннэргэ Өймөкөөн улууһуттан урукку сылларга Олоҥхо ыһыаҕар улуус чиэһин хаста да көмүскээбит айар бөлөхтөр кыттыыны ылыахтара. Бүгүн кинилэр тустарынан билиһиннэрэбит.
Баһылык граннаах бөлөхтөр
Томтордооҕу Култуура дьиэтин уус-уран салайааччыта Евдокия Готовцева салайар “Куйаар дьүрүскэнэ” этно-фольклор ансаамбыла хас да хайысхалаах бөлөхтөн турар.
— 2017 с. тэрийбит аҕыйах киһилээх ансаамбылым кыттааччыта элбээн, эһиилигэр хас да айар бөлөххө араарбытым.
Ол курдук, “Дуолан” – күпсүүрдээх уолаттар, “Өбүгэ ситимэ” – олоҥхоһуттар, “Һэй-До!” – этноквартет, маны таһынан, кылыһах уонна хомусчуттар бөлөхтөрө бааллар. “Һэй-До!” – этноквартет 2019 с. “Бастыҥ айар кэлэктиип” номинацияҕа улуус баһылыгын гранын, “Дуолан” бөлөх баһылык гранын 2024 с. ылбыттара. “Һэй-До!” – этноквартет Хабаровскайга, Үөһээ Бүлүүгэ, Аммаҕа, Өймөкөөҥҥө буолбут Олоҥхо ыһыахтарыгар кыттыбыта. Онон ансаамбылым дьоно бары араас тэрээһиннэргэ кыттарга үөрүйэх уопуттаах дьон.
Олоҥхонон бастакы кыттыыбыт буолар. 2018 с. Майаҕа күннээбиппит. Онно норуоттар икки ардыларынааҕы бэстибээлгэ сэттиэ буолан кыттан, 6 лауреат, биир дипломант аатын ылбыппыт. «Кылыһах» бөлөх Нерюнгригэ ыытыллар Олоҥхо ыһыаҕар ох курдук оҥостон баран эрэбит, — диэн санаатын үллэһиннэ “Куйаар дьүрүскэнэ” ансаамбыл бөлөхтөрүн салайааччыта Евдокия Готовцева.
Өймөкөөн улууһун пресс-сулууспата