Үчүгэй нэһилиэгин олохтооҕо Мария Винокурова 2022 сыллаахха Үөһээ Бүлүүгэ ыытыллыбыт Олоҥхо ыһыаҕар сылдьыбыт.
— Улуус салалтата 2023 с. Олоҥхо ыһыаҕын ыытар буолан, элбэх киһилээх дэлэгээссийэни илдьэ барбыта. Инньэ гынан олус сэргээн, астынан кэлбитим. Араас оҥоһугу илэ көрөн, айыах-тутуох санаам биллэ баһыйбыта. Сүрүннээн сиэлинэн уонна кылынан оҥоһуктары, паннолары оҥоробун. Өймөкөөммүтүгэр буолбут Олоҥхо ыһыаҕар ат суларын, көнтөһүн оҥорбутум. Быйыл сылгыны тараан, ол түүтүттэн панно оҥордум.
Соторутааҕыта улуус киинигэр буолбут Сомоҕолоһуу уонна доҕордоһуу ыһыаҕар прикладной ускуустуба куонкуруһугар 1-кы миэстэни ыллым. Аны бу күннэргэ улуустааҕы Өймөкөөн ыһыаҕар кытта барыам. Онон улууспутугар эмиэ ыһыахтар бэрт тэрээһиннээхтик буола тураллара кэрэхсэбиллээх суол. Киһи итинник тэрээһиннэргэ сылдьан уопутурар, сонун сүүрээннэри тобулар. Онтон Нерюнгригэ буолар Олоҥхо ыһыаҕар кыттыы — улахан эппиэтинэс буоллаҕа, — диэн санаатын үллэһиннэ Мария Винокурова.
… Ити курдук, Өймөкөөн улууһун дэлэгээссийэтэ сотору кэминэн Нерюнгригэ ыытыллар Олоҥхо ыһыаҕар тиийэн, үгүс дьону кытта алтыһан, улууспут аата дорҕоонноохтук ааттаныаҕа.
Өймөкөөн улууһун пресс-сулууспата