Өймөкөөн улууһугар быйылгы дьыл Патриот сылынан биллэриллибитэ. Онон улуус Култуура дьиэлэригэр сэтинньи 4 күнүгэр – Норуот сомоҕолоһуутун күнүгэр — сөп түбэһиннэрэн, анал байыаннай дьайыыга сылдьар буойуттары өйүүргэ аһымал аахсыйалар, кэнсиэрдэр ыытыллыахтара. Сэтинньи ортотугар улуус бэрэстэбиитэллэрэ анал байыаннай дьайыы зонатыгар уочараттаах сырыылара былааннанар.
Быйылгы дьылга улууска “Көрдөөх арена” диэн цирк устуудьуйата тэриллибитэ 45 сыла бэлиэтэнэр. Онон сибээстээн улуус киинин уһуйааннарын иитиллээччилэрин, оскуола оҕолорун түмэн, улахан испэктээк туруорар былаан баар. Манна кылаабынай дьоруойдарынан цирковой устуудьуйаҕа дьарыктанар оҕолор буолуохтара. Испэктээги “Металлург” КДь уус-уран салайааччыта, бу иннинэ Томтордооҕу норуот тыйаатырын режиссерынан ситиһиилээхтик үлэлээбит СӨ култуура уонна ыччат бэлиитикэтин туйгуна Татьяна Заболоцкая туруоруоҕа.
Сэтинньигэ Томтор нэһилиэгин норуот тыйаатырын норуодунай аатын көмүскүүр испэктээгин эдэр исписэлиис Дайаана Тоскина туруораары үлэлии-хамсыы сылдьар. Саҥа режисер “Сайсары” диэн Суорун Омоллоон айымньытынан дьүһүйүүнү туруоруоҕа. Оттон улуус киининээҕи норуот тыйаатыра отчуоттуур кэнсиэрин сэтинньи бүтүүтэ көрдөрөөрү бэлэмниир.
Сэтинньи 15 күнүгэр Төрүт нэһилиэгэр “Көмүс дорҕоон” диэн олоҥхону уонна фольклору толорооччулар улуустааҕы күрэстэрэ ыытыллыаҕа.
Ааспыт сылга “Өймөкөөн сулустара” улуустааҕы вокальнай куонкурус кыайыылаахтарынан Өймөкөөн нэһилиэгин “Дуораан” бөлөҕө буолбута. Онон улуустааҕы тэрээһин быйыл бу нэһилиэккэ сэтинньи 28 күнүгэр ыытыллар.
Уус-Ньаратааҕы Оҕо музыкальнай оскуолата “Муусука – барыбытыгар” уочараттаах музыкальнай куонкуруһу бэлэмниир.
Уус-Ньара тэрилтэлэрин икки ардыларынааҕы култуурунай-спортивнай спартакиада чэрчитинэн ахсынньы 12 күнүгэр “Икки сулус” вокальнай дуэттар куонкурустара дьон дьүүлүгэр тахсыаҕа.
“Кыһын Саха сириттэн саҕаланар” өрөспүүбүлүкэтээҕи бэстибээл чэрчитинэн Томтор нэһилиэгэр сэтинньи бүтүүтэ аан дойдуга тымныыны харыстааччы Чысхаан сирэ-туома ыытыллыаҕа. Тымныы Хотуна уонна Дьокуускайтан бэрэстэбиитэллэр Чысхаан резиденциятыттан Тымныы Символын тиксэрии сиэрин-туомун ыыта кэлиэхтэрэ. Өймөкөөн улууһун уран тарбахтаах Далбар хотуннара быйыл куонкуруска кыһыҥҥы национальнай таҥаһы тигэн көрдөрүөхтэрэ. Ахсынньы 1 күнүгэр бүтүн өрөспүүбүлүкэ үрдүнэн харыйалар күлүмүрдүү умайыахтара.
Любовь Кривошапкина