Соторутааҕыта Дьокуускайга академик В.П. Ларионов аатынан «Инникигэ хардыы» өрөспүүбүлүкэтээҕи билим-практическай кэмпириэнсийэтин 30 сыллаах үбүлүөйдээх тэрээһинигэр Өймөкөөн улууһун үөрэнээччилэрэ кытыннылар.
Өймөкөөн оҕолоро араас тиэмэлэринэн дьаныһан туран оҥорбут, чинчийбит үлэлэринэн ситиһиилээхтик кытыннылар.
Үчүгэй орто оскуолатын 8-с кылааһын үөрэнээччитэ Семен Сивцев история секциятыгар 3-с бочуоттаах миэстэни ситистэ. Онон эдэр чинчийээччи бу ый бүтүүтэ Бүтүн Арассыыйатааҕы кэмпириэнсийэҕэ кыттарга путевка тутта.
— Мин маннык таһымнаах кэмпириэнсийэҕэ саҥа кытынным. Учууталым Мария Сергеевна Атласованы кытта история уонна обществознание тиэмэлэрин арыйан үлэбитин саҕалаабыппыт. Мария Сергеевналыын уһуну-киэҥи толкуйдаан баран, анал байыаннай дьайыыга олоҕун толук уурбут сөбүлүүр учууталым Павлов Айаал Русланович туһунан суруйарга быһаарыммыппыт. «Мин учууталым — биһиги кэммит дьоруойа» диэн бырайыагым учууталым аатын үйэтитии буолар. Мин түгэнинэн туһанан, салайааччыбар Мария Сергеевнаҕа уонна төрөппүттэрбэр махталбын тиэрдэбин, — диэн санаатын үллэһиннэ Семен.
Бу туһунан сиһилии “Хотугу сардаҥа” хаһыакка ааҕыҥ.
Евдокия Егорова