Өрөспүүбүлүкэ таһымнаах улахан суолталаах дьаһалга Өймөкөөн улуһуттан 28 педагог кыттыбыта. Үөрэҕирии бырагырааматыгар 101 тэрээһин буолбута уонна 5 былаһаакка үлэлээбитэ.
Быйылгы тэрээһин сүрүн тиэмэтинэн үөрэх-иитии хаамыытыгар доруобуйаны харыстыыр технологиялары олоххо киллэрии буолла.
Варвара КОНСТАНТИНОВА, Сордоҥноох орто оскуолатын дириэктэрэ:
— Атырдьах ыйынааҕы педагогтар мунньахтара бастакы күн олус таһаарыылаахтык ааста. Манна Сордоҥноох орто оскуолатыттан үс буолан кытынныбыт.
Мин оҕо күнүскү лааҕырын туһунан үлэбин сырдаттым. Атын улуустар учууталларын кытта уопут атастастыбыт. Кыттааччылар араас хайысхалаах лааҕырдар тустарынан уонна уруокка туһанар технологияларын сиһилии кэпсээтилэр.
Елена ЧЕРЕМКИНА, кыраайы үөрэтээччи, Төрүт орто оскуолата:
— Үөрэҕирии үлэһиттэрин атырдьах ыйынааҕы мунньахтара өрүү буоларын курдук үрдүк таһымнаахтык ыытылынна. Мин чинчийии үлэтигэр уонна быраактыкаҕа туһуламмыт «төгүрүк остуолга» сырыттым. Ону тэҥэ араас улуус учууталлара хамаандаларга арахсан үтүө уопуппутун үллэһиннибит.
Мин атырдьах ыйынааҕы сүбэ мунньах иккис күнүгэр “Доруобуйаны харыстыыр үөрэх технологиялара” диэн сексцияҕа сырыттым.Манна кыттан баран биһиги оҕолорбут, учууталларбыт ис туруктарын бөҕөргөтүүгэ ураты болҕомто ууруохтаахпыт диэн санааҕа кэллим.
Бу туһунан сиһилии “Хотугу сардаҥа” хаһыакка ааҕыҥ.
Евдокия Егорова