Ыам ыйыгар улууска оҕо сайыҥҥы сынньалаҥын тэрийии боппуруоһугар биэдэмэстибэлэр икки ардыларынааҕы хамыыһыйа киэҥ ыҥырыылаах мунньаҕа ыытыллыбыта. Ол түмүгүнэн Өймөкөөн оройуонугар биэс күнүскү лааҕыр бэс ыйын 5 күнүттэн, үс үлэ лааҕыра бэс ыйын 16 күнүттэн аһыллыахтара.
Өймөкөөн орто оскуолатын дириэктэри иитэр үлэҕэ солбуйааччы Матрена Готовцева иһитиннэрбитинэн, кинилэргэ бэс ыйын 4 күнүттэн «Чэчир» күнүскү оҕо лааҕыра үлэлиэҕэ. Манна сыллата 25-тии оҕо сайыҥҥы сынньалаҥын туһалаахтык атаарар. Лааҕыр хайысхата – оҕо этин-хаанын уонна доруобуйатын чэбдигирдии.
Төрүт орто оскуолатыгар бу сайын икки оҕо лааҕыра аһыллыаҕа. Күнүскү лааҕырга 15 алын сүһүөх кылаас үөрэнээччитэ сынньаныаҕа.
Оттон үлэ уонна сынньалаҥ лааҕырыгар 7 оҕо суруттарбыта, сүрүннээн, 8-10 кылаас үөрэнээччилэрэ. Төрүт оскуолата агро-хайысхалаах буоларын быһыытынан, кинилэр күрүө тутуутугар, оҕуруот аһын олордууга о.д.а. үлэ араас уопутугар үөрэниэхтэрэ.
Үчүгэй орто оскуолатыгар сайыҥҥы лааҕыр 25 алын сүһүөх кылаас оҕолорун хабан үлэлиэҕэ. Манна бэс ыйын 2 күнүттэн «Күнчээн» диэн уус-уран эстетическэй хайысхалаах лааҕыр аанын тэлэччи аһыаҕа.
Сордоҥноох нэһилиэгэр сайын устата икки лааҕыр үлэлиирэ былааннанар. Бастакы сезоҥҥа 25 оҕо «Мичээр» диэн эти-хааны чэбдигирдэр лааҕырга сылдьыаҕа. Иккис сезон «Росток» лааҕырыгар 15 үөрэнээччи самаан сайын үтүө күннэрин атаарыаҕа. Лааҕыр экологическай-туристическай хайысхалаах үлэлиэҕэ.
Оҕо сынньалаҥын тэрийии сыллата тустаах болҕомтону эрэйэр. Бастакы сезоҥҥа бэлэмнэнии бара турар. Улуус нэһилиэктэригэр сайыҥҥы лааҕырдар сотору кэминэн аһыллан үлэлэрин саҕалаан, оскуола тэлгэһэтэ оҕо саҥатынан чугдарыа турдаҕа.
Бу туһунан сиһилии “Хотугу сардаҥа” хаһыакка ааҕыҥ.
Евдокия ЕГОРОВА