Аҕа дойду Улуу сэриитин кыттыылааҕа, Саха АССР култууратын үтүөлээх үлэһитэ Заболоцкай Максим Иванович Өймөкөөн улууһун дьонун-сэргэтин киэн туттар олохтоохторуттан биирдэстэрэ буолар.
Кини уола Максим Заболоцкай Томтор нэһилиэгэр “Сахаэнерго” ААУо Өймөкөөннөөҕү РЭС-гар 40-н тахса сыл таһаарыылаахтык үлэлээн кэллэ.
— Мин аҕам Заболоцкай Максим Иванович Аҕа дойду сэриитин бэтэрээнэ этэ. Ийэм Винокурова Анна Михайловна оҕо саадыгар асчытынан үлэлээбитэ, — диэн кэпсиир Максим Максимович. – Биһиги бииргэ төрөөбүттэр сэттиэбит, мин соҕотох уолбун.
Максим 1983 сыл оскуоланы бүтэрэн баран, ыстаансыйаҕа электригинэн үлэлии киирбитэ. Ити курдук кини эдэркээн сылдьан талан ылбыт идэтинэн күн бүгүҥҥээҥҥэ диэри үлэлээн кэлбитэ кэрэхсэбиллээх. Дэлэҕэ даҕаны кини Өймөкөөн улууһугар энергетика Бочуоттаах үлэһитэ диэн ааты аан бастакынан ылыа дуо. Маны тэҥэ Максим Максимович 2020 сыллаахха Саха сиригэр энергетика сайдыытыгар киллэрбит кылаатын иһин “Якутскэнерго” ПАО бэтэрээнэ буолбута. Кини өр сыллаах сыралаах үлэтэ сыаналанан, бу тэрилтэ үрдүкү салалтатыттан Махтал суруктары хаста даҕаны туппута.
М.М. Заболоцкай оскуола кэнниттэн электригинэн үлэлии сылдьан 2 сыл Монголияҕа баран сулууспалаан, Ийэ дойдутугар ытык иэһин толорон кэлбитэ. Үөлээннээхтэрэ ахталларынан, кини аармыйаҕа сулууспалыыр баҕата олус күүстээҕэ. Максимы сэрии бэтэрээнин кыттыылааҕын соҕотох уола диэн бастаан аармыйаҕа ылымаары гыммыттар эбит. Ону кини бэйэтэ туруорсан военкомакка хаста даҕаны тиийэ сылдьыбытын быһа гыммакка, баҕа санаатын толорбуттар.
Ити курдук, Аҕа дойду Улуу сэриитин кыттыылааҕын уола Максим Заболоцкай биир сиргэ өр сыллар усталарыгар үлэлээн, төрөөбүт түөлбэтэ кэлимник сайдарыгар сэмэй кылаатын киллэрбит Өймөкөөн олохтоохторуттан биирдэстэрэ буолар.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина