Варвара ИВАНОВА, үлэ бэтэрээнэ, Сордоҥноох нэһилиэгэ:
— Мин бүгүн «Хотугу сардаҥа» хаһыат маҥнайгы нүөмэрин илиибэр тутан олоробун. Биһиги кэргэнимминээн Евгений Петровичтыын атаспыт, доҕорбут, кылааһынньыкпыт Сергей Михайлович Егоров сүүрэн-көтөн оройуоммут туспа оройуон буолбута 60 сылыгар сөп түбэһиннэрэн, народнай депутаттар оройуоннааҕы Сэбиэттэрин президиума урут сахалыы тылынан тахса сылдьыбыт «Хотугу сардаҥа» хаһыаты иккистээн сөргүтэн таһаарарга быһаарбыта. Ити кэмҥэ Сэргэй биһиэхэ анаан бастакы нүөмэри автографтаан кэһии гынан аҕалбыта. Онтон ыла “Хотугу сардаҕаны” арахсыспат аргыс оҥостон сурутан ааҕабыт, мунньабыт.
Араас сылларга тахсыбыт нүөмэрдэри архыыбтаан, оччотооҕу кэми өйдүүбүт.
Урукку «Хотугу сардаҥа» нууччалыы тахсар хаһыакка кубулуйан хаалбыт кэмнээҕэ. Сахалыы «Хотугу сардаҥа» хаһыат өр кэмҥэ тахсыбатаҕыттан олохтоох саха нэһилиэнньэтин култуурата, тыла-өһө биллэрдик мөлтөөн барбыта. Сырдатыы намтаан, билиибит-көрүүбүт чычаас, уопсай сайдыыбыт намыһах буолан үтүө үгэстэртэн тэйэ быһыытыйбыппыт.
Онтон дьэ 1991 сыллаахха оройуоммутугар «Хотугу сардаҥа» сөргүтүллэн, хаһыакка үлэ-хамнас сырдатыллан, норуоппут үтүө үгэстэри ылынан, урукку кэм кэрчиктэрин, ситиһиилэри, дьиэ кэргэн олоҕун, иитии-үөрэтии сонуннарын о.д.а. утаппыттыы ааҕан, олохтоох бэчээт ыал аайы күүтүүлээх кэрэ кэпсээн кэһиилээх үтүө сүбэһит, атас-доҕор буолбута.
Тапталлаах хаһыаппыт «Хотугу сардаҥа» төрүттэммитэ 35 сылынан уонна Саха сиригэр Национальнай бэчээт күнүнэн махтал тылларын аныыбын. Матырыйааллары бэлэмнээн, бэчээттээн, таҥан таһаарар хаһыат үлэһиттэрин итиитик-истиҥник эҕэрдэлиибин. Сыралаах үлэҕит түмүктээх буоллун, тус бэйэҕитигэр чэгиэн доруобуйаны, дьоллоох уһун олоҕу, или-эйэни, үгүс үөрүүнү ис сүрэхпиттэн баҕарабын!
Евдокия Егорова