Бу күннэргэ “Өймөкөөн улууһа” МТ баһылыгын бастакы солбуйааччыта Алексей Федотов салайааччылаах бөлөх Төрүт сэлиэнньэтигэр уонна Өймөкөөн куустатын атын нэһилиэктэригэр үлэни-хамнаһы билсэ айаннаата.
Баһылыгы солбуйааччы Алексей Федотов командировкаҕа барыан иннинэ улууска үөскээбит уопсай балаһыанньаны биһиги кэрэспэдьиэммитигэр маннык билиһиннэрдэ.
— Дьаһалта өттүттэн билигин ордук улахан болҕомто Төрүккэ ууруллар. Бу нэһилиэк дьоно-сэргэтэ Славка учаастагын сиригэр-уотугар баар электрическай уотунан хааччыйар трансформатор ууттан эмсэҕэлээбитин түмүгэр, төрдүс сууккаларын уота уонна сибээһэ суох олороллор.
“Магаданэнерго” ПАО үлэһиттэрэ нэһилиэккэ уу таһыма улахан буолан, өрөмүөн үлэтин ыыта кыайан тиийэ иликтэр. Хомойуох иһин, бу тэрилтэҕэ көһө сылдьар дизельнэй электростанциялара суох буолан, бүтүн нэһилиэк (ол иһигэр 62 оҕо, 3 инбэлиит) ыарахаттары көрүстэ.
Элги үрэх хаатыттан тахсан, Төрүт нэһилиэгин эҥээр сытар хас даҕаны учаастакка тиийэр суолу-ииһи халаан уута ылан, үгүс киһи, ол иһигэр оҕолор хаайтардылар. Тыа хаһаайыстыбатынан дьарыктанааччылар бэлэмнээбит отторо ууга былдьанна.
Манна даҕатан эттэххэ, от ыйын 29 күнүгэр Төрүт нэһилиэгэр баһылык э.т. Мария Атласова, тэрилтэлэр салайааччылара, бэрэстэбиитэллээх уорганнар дьокутааттара, уопсастыбаннас кыттыылаах сүбэ мунньах ыытылынна.
“Быйыттаах” учаастагар оҥочонон дьаһалтаттан тиийэ сылдьыбыттарыгар, онно баар дьон билиҥҥитэ эвакуацияттан аккаастаналларын биллэрбиттэр. Итинэн уу түһэрин кэтээн көрүү, эппиэтинэс кинилэргэ бэйэлэригэр сүктэриллэр.
— Атын учаастактарга хаайтарбыт отчуттар боппуруостарын хонтуруолга тутабыт, — диэтэ А.В. Федотов.
Өймөкөөн улууһугар бу күннэргэ халаан уутугар үрдүк таһымнаах бэлэмнээх буолуу эрэсиимэ олохтонно. “Халыма” федеральнай трассаҕа Томпо улууһун сиригэр эмиэ ардахтан сылтаан суол-иис хас да сиринэн быстыбыта, элбэх муоста эмсэҕэлээбитэ биллэр.
— Билигин саамай сүрүн кыһалҕабытынан улуус үрдүнэн суотабай сибээс быстар мөлтөхтүк үлэлиирэ, сорох ардыгар олох да сүтэн хаалара буолар, — диэн тоһоҕолоон бэлиэтээтэ Алексей Васильевич. – От ыйын 13 күнүттэн ыла маннык балаһыанньа салҕанар. Бу кыһалҕа туһунан өрөспүүбүлүкэ таһымыгар тутатына биллэриллибитэ, сайаапкалары быыстала суох ыыта турабыт.
Уматык боппуруоһугар тохтоотоххо, Өймөкөөн улууһугар “Туймаада-нефть” хампаанньа уонна “Саханефтегазсбыт” ААУо заправкалыыр ыстаансыйалара нэһилиэнньэни уматыгынан хааччыйаллар.
Улууска суолу-ииһи өрөмүөннүүр бэдэрээтчиттэргэ “Туймаада-нефть” хампаанньа эбии 20 тыһ. туонна уматыгы көрдө. Оттон бу нэдиэлэ саҥатыгар биллибитинэн, “Саханефтегазсбыт” ААУо заправкалыыр ыстаансыйата суох нэһилиэктэри оттооһун хампаанньатын кэмигэр эбии 15 тыһ. туонна уматыгынан хааччыйыахтаах. Оччотугар отчуттар уматыгы көрүллүбүт нуорманан таараларга куттан туһанар кыахтаныахтара.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина