Бу күннэргэ уһун ардахтар кэннилэриттэн Өймөкөөн улууһун үс нэһилиэгин сиригэр-уотугар халаан уута халыйда.
“2-с Бороҕон нэһилиэгэ” МТ дьаһалтатын баһылыга Алексей Винокуров иһитиннэрбитинэн, Өймөкөөн куустатыгар уу таһыма үрдээн, бу күннэргэ кэккэ мэһэйдэри үөскэттэ.
— Томтор сэлиэнньэтигэр күн бүгүҥҥээҥҥэ диэри Буор үрэх таһыма улаата турар, билигин 10 см үрдээбит, — диир Алексей Николаевич. – Ол гынан баран Дьокуускайы кытта сырыы баар. “Наледнайга” (Тарыннаах үрэҕэр) алдьаммыт суолу оҥордулар, онно СӨ тырааныспар миниистирин солбуйааччы Анатолий Потапов бэйэтинэн кэлэ сырытта. Оттон суотабай сибээс чааһын ыллахха, икки оператордарга 4G кэлэ-кэлэ барар, Wi-Fi (вайфай) олох да суох. Тустаах тэрилтэҕэ тахсан, ол туһунан биллэрбиппит даҕаны, билиҥҥитэ туох да дьаһал ылылла илик.
Оттон Сордоҥнооххо кэлии-барыы, туох да сырыы билигин суох. Нэһилиэк баһылыга Альберт Вензель аҕыйах хонуктааҕыта уоппускатыттан таҕыста. Кини массыынатын Томторго хаалларан баран, Куйдуһун үрэҕи мотуордаах оҥочонон туораабыт. Баһылык этэринэн, уу таһыма түстэр эрэ, массыынатыгар тиэммит Дьокуускайтан аҕалбыт тутуу матырыйаалын нэһилиэккэ тиэрдиэхтэрэ. Бу күннээххэ Сордоҥнооххо диэри айан суолугар толооннору хас эмэ килэмиэтиринэн тайаан, халаан уута ылан турар.
-Уопсай балаһыанньа нэһилиэкпитигэр кэминэн, отчуттар тустаах былааннарын толорор соруктаахтар, тэрилтэлэр этэҥҥэ үлэлии тураллар. Оскуоланы саҥа үөрэх дьылыгар бэлэмнээн, оҕолору көрсөргө бэлэмнэр. Сибээс баар, араадьыйа үлэлиир. Биир тылынан, былааннаах үлэ-хамнас барар, — диэн иһитиннэрдэ Альберт Николаевич.
“Өймөкөөн Тымныы Оройо” МТ дьаһалтатын Ыксаллаах быһыыга-майгыга салаатын кылаабынай исписэлииһэ Степан Готовцев этэринэн, Өймөкөөн нэһилиэгэр ардахтар кэннилэриттэн уу таһыма биир кэминэн турар. Бөһүөлэк иһигэр уу суох эрээри, Томторго диэри суол туруга быстар мөлтөх. Билигин ыксаабыт, дьиҥ кыһалҕаҕа ыктарбыт эрэ дьон айанныыр балаһыанньалара үөскээн турар. Нэһилиэккэ суотабай сибээс баар, араадьыйа тэрилэ бастакы уһун ардахтар кэннилэриттэн алдьаммытын, Дьокуускайга өрөмүөннэтэ ыыппыттар.
Санатар буоллахха, халаан уутунан сибээстээн, Өймөкөөн улууһугар от ыйын 12 күнүттэн ыксаллаах быһыы-майгы балаһыанньата биллэриллэн турар.
Любовь Кривошапкина
Хаартыскалары нэһилиэктэр баһылыктара тиксэрдилэр