Ааспыт сыл бүтүүтүгэр Үчүгэй нэһилиэгэр «Экстра Синема» киинэ саалатын үөрүүлээх быһыыга-майгыга арыйыы сиэрэ-туома ыытыллыбыта. Олохтоохтор киинэ саалатын «Аймакан» диэн сүрэхтээтилэр. «Аймакан» диэн эбээн тылыттан тылбаастаатахха, «күн тахсыыта», «барыта үчүгэй», «ис дууһаттан» диэн буолар.
Андрей Громов-Агди аатынан этнокултуурунай киин дириэктэрэ Аяна Эверстова Ил Түмэн дьокутаата, «Якутскэнерго» ПАО генеральнай дириэктэрэ Гаврил Алексеев уонна улуустааҕы Сэбиэт дьокутааттарын киинэ тэриллэрин атыылаһыыга күүс-көмө буолбуттарыгар улахан махталын тиэрдэр.
Манна бастаан Айаал Струкин «Как стать боссом» диэн киинэтин көрдөрдүлэр. Оттон Саҥа дьыл өрөбүллэригэр оҕолор «Тооку уонна Чысхаан» диэн толору кээмэйдээх ойуулугу улахан экраҥҥа көрөн үөрүүлэрэ үксээтэ.
Бу туһунан сиһилии “Хотугу сардаҥа” хаһыакка ааҕыҥ.
Евдокия Егорова