Бэс ыйын 24 күнүгэр Уус-Ньаратааҕы «Чысхаан» стадионун киэн уораҕайыгар “Тымныы полюһа” өрөспүүбүлэкэтээҕи альпинизм бэстибээлин аһыллыытын сиэрэ-туома ыытылынна.
Альпинизм бэстибээлэ биһиги улууспутугар 2022 сыллаахтан киэҥ далааһыннаахтык ыытыллар. Манна баҕалаахтар Саха сирин, Арассыыйа араас муннуктарыттан кэлэн бэйэлэрин кыахтарын бэрэбиэркэлэнэллэр. Бэстибээл бэс ыйын 30 күнүгэр диэри аатырбыт Таас Кыстаабыт сис хайа кэрэ көстүүлээх Афродита очуоһун анныгар ыытыллыаҕа. Манна «Альпинист России» нуорматын толорбут спортсменнар анал бэлиэ тутуохтара уонна дастабырыанньа ылыахтара.
Кыттааччылары Уус-Ньара бөһүөлэгин баһылыга Виктория Понамарчук, Өймөкөөн улууһунааҕы туризм салаатын салайааччыта Евгений Кривошапкин эҕэрдэлээтилэр. Быйылгы бэстибээл бочуоттаах кыттыылаахтарынан Арассыыйа үтүөлээх айанньыта Валерий Богомолов, альпинистар түмсүүлэрин ыстаарсай тириэньэрэ Василий Иванов, бу түмсүү быыһааччыларын этэрээтин начаалынньыга Алексей Лыков, альпинизмҥа успуорт маастара Роман Абилдаев, СӨ альпинизм федерациятын бэрэссэдээтэлин солбуйааччы Александр Спиридонов буоллулар.
Тэрээһин үөрүүлээх аһыллыытын үҥкүүнэн уонна ырыанан Уус-Ньаратааҕы орто оскуола уонна Уус-Ньаратааҕы гимназия үөрэнээччилэрэ, «Золотинка” үҥкүү бөлөҕүн солистара киэргэттилэр. Тэрээһин түмүгэр бочуоттаах ыалдьыттар уонна кыттааччылар оҕолор ыйытыктарыгар хоруйдаатылар. Ол курдук Роман Абилдаев оҕолорго туһаайан, күүстээх санаалаах ким баҕарар альпинист буолуон сөптөөх диэтэ. Кини тымныы полюһун олохтоохторо очуос хайалар быыстарыгар олорор дьоллоох дьоҥҥут диэн туран, кэрэ айылҕалаан дойдугутунан киэн туттуох тустааххыт диэтэ.
Ольга Скрыбыкина