Соторутааҕыта Үчүгэй нэһилиэгэр көлүөнэлэр икки ардыларынааҕы 5-с комплекснай спартакиада аһыллыыта ыытылынна.
Бу тэрээһин үгэс быһыытынан сэтинньи ыйтан саҕаланан баран, кэлэр сыл бэс ыйыгар түмүктэнэр. Манна барыта 28 көрүҥ киирэр.
Быйылгы тэрээһин анал байыаннай дьайыыга сылдьан баара-суоҕа 35 сааһыгар күн сириттэн барбыт Сунтаартан төрүттээх биэс оҕо амарах аҕата Айаал Павлов кэриэһигэр ананар.
Айаал Русланович Үчүгэй орто оскуолатыгар история учууталынан үлэлии сылдьан оҕону патриоттуу быһыыга-майгыга иитиигэ улахан болҕомтотун уурара, төрөөбүт дойдутун дьиҥнээх патриота этэ.
Спартакиаданы тэрийэн ыытыы аан бастаан 2015 с. Үчүгэй орто оскуолатын физкультура учуутала Николай Исаков көҕүлээһининэн, Айаал Павлов өйөбүлүнэн олоххо киирбитэ.
Күрэххэ нэһилиэк олохтоохторо 14 саастарыттан саҕалаан, эдэрдиин-эмэнниин кытыннылар. Бастакы түһүмэҕинэн көлүөнэлэр икки ардыларыгар көрдөөх оонньуулар ыытылыннылар, бу күрэхтэһии тоҕус көрүҥүнэн барда.
Түмүккэ “Тэтим” хамаанда кыайыылааҕынан таҕыста. Оттон 2-с миэстэни «Дабаан» хамаанда ылары ситистэ. «Дьулуур» хамаанда 3-с миэстэ уонна «Добуннар» төрдүс буоллулар.
Евдокия Егорова