Улуу Кыайыы күнүн көрсө Дьокуускай куоракка олорор Өймөкөөн улууһуттан төрүттээх биир дойдулаахтарбытын эҕэрдэлиир үтүө үгэспитин быйыл биһиги эмиэ тутустубут.
Сыл аайы улуус дьаһалтатын кытта бииргэ бэлэх оҥорон кырдьаҕастарбытын үөрдээччибит. Быйыл үп-харчы кырыымчык буолан, оройуон өттүттэн үбүлээһин кыайтарбата. Онон активистар бэйэбит депутаппытыгар — Ил Түмэн депутатыгар, “Якутскэнерго” ПАО генеральнай директорыгар Гаврил Николаевичка Алексеевка сурук тиэрдибиппитигэр, тута сөбүлэһэн, бэтэрээннэргэ анаан бэртээхэй бэлэх оҥордо.
Ытык кырдьаҕастарбыт – тыыл бэтэрээннэрэ Павел Павлович Кондаков (Биэрэк Үрдүттэн төрүттээх), Авдотья Яковлевна Винокурова (төрдө Хара Тумул), Екатерина Прокопьевна Иванова (Өймөкөөн нэһилиэгиттэн), Лариса Васильевна Скрябина (Тарын-Үрэхтэн тардыылаах) бырааһынньыктааҕы бэлэх тутан олус үөрдүлэр.
«Өймөкөөн» совхозка өр кэмҥэ үтүө суобастаахтык, таһаарыылаахтык үлэлээбит дьоммут Ульяна Деомидовна Слепцова, Николай Ильич Винокуров (билигин Намҥа олорор), Ульяна Иннокентьевна Атастырова, Степан Семенович Ефимов уонна Василий Степанович Винокуров («Өймөкөөн», «Үчүгэй» совхозтар) дойдуларын бэлэхтэриттэн үөрүүлэрэ үрдээтэ.
Улуустааҕы землячество аатыттан бэлэхтэрбитин туттарыыга, тарҕатыыга «Өймөкөөн» түмсүү активистара Фаина Афанасьевна Румянцева, Светлана Захаровна Винокурова, кини кыыһа Аэлита Пономарева, Николай Николаевич Иванов, кини уола Коля, Андрей Артурович Готовцев уонна Геннадий Николаевич Ефремов көмөлөстүлэр. Кинилэргэ барыларыгар махтал буолуохтун!
Анна АТАСТЫРОВА,
Өймөкөөн улууһун
Землячествотын салайааччыта,
Дьокуускай к.
Бу туһунан сиһилии «Хотугу сардаҥа» хаһыакка ааҕаарын