Өймөкөөн улууһун киинигэр гимнастикаҕа саҥа тириэньэр баар буолла — 2024 сылтан Уус-Ньаратааҕы Оҕо спортивнай оскуолатыгар Ида Сивцева кырачаан кыргыттары дьарыктыыр. Төһө да аҕыйах бириэмэ аастар, улуус кырачаан гимнасткалара бэлиэр кэккэ ситиһиилээхтэр.
Ол курдук, бэс ыйын саҕаланыытыгар бу оскуола алта иитиллээччитэ «Юные таланты Арктики» диэн өрөспүүбүлүкэтээҕи аһаҕас турнирга ситиһиилээхтик кыттан кэллилэр.
Адалина Сивцева, Айхаана Лиханова, Ева Пламадяла биирдиилээн бырагыраамаҕа бэйэлэрин саастыылаахтарын истэригэр тэҥнээхтэрин булбатылар. Адалина 1-кы миэстэ, Айхаана — иккис, Ева — 3-с миэстэҕэ таҕыстылар. Уопсай көрдөрүүгэ Нарыйа Березкина, Сандаара Андреева, Адалина Сивцева, Кира Шевченко бастаатылар.
— Мин гимнастиканы кытта ыкса билсиһиибин декретнэй уоппускаҕа олорон саҕалаабытым, — диэн кэпсиир тириэньэр Ида Сивцева. — Улахан кыыһым Адалина гимнастиканан дьарыктаныан баҕарарын көрөн, хайдах Уус-Ньараҕа бэлэмнэниэххэ сөбүн үөрэтэн барбытым. Мин анал үөрэҕим суох эрээри, улахан баҕа санаам кыайбыта, хотугу сир оҕолоругар гимнастика курдук нарын уонна кэрэ успуорт көрүҥүн арыйар санаа миигин үүйэ-хаайа туппута.
Билигин миэхэ 13 оҕо нэдиэлэҕэ үстэ дьарыктанар. Төһө даҕаны усулуобуйа мөлтөҕүн үрдүнэн, дьарыкпыт барар, кылаабынайа, күүстээх баҕа санаалаах буолуохха эрэ наада.
Быйыл иитиллээччилэрбин кытта түөрт төгүл араас таһымнаах күрэхтэргэ кыттан син уопутурдубут, элбэххэ үөрэннибит.
Төрөппүт Ирина Лиханова санаатын билсиэҕиҥ:
— Мин кыыһым Айхаана гимнастиканан ааспыт сыл алтынньытыттан сөбүлээн дьарыктанар. Кини Уус-Ньаратааҕы И. Хоменко аатынан орто оскуола 1-кы кылааһын ситиһиилээхтик бүтэрдэ. Кыра эрдэҕиттэн имигэс, бэйэтин кыанар кыысчаан. Кини өссө “Золотинка” үҥкүү бөлөҕөр дьарыктанар. Онно сырыттаҕына кыыспын Ида Устиновна бэлиэтии көрөн, гимнастикаҕа ыҥырбыта.
Тириэньэрбит И.У. Сивцева олус сэмэй эрээри, ирдэбиллээх киһи. Кини Дьокуускайга оҕолору элбэх күрэххэ илдьэ сырытта. Ол олус туһалаах дии саныыбын. Айхаана билигин бастакы разряды ситиһиилээхтик толорбута.
Биһиги оҕобутун куруутун өйүүбүт, кини ситиһиилэринэн киэн туттабыт. Ида Устиновнаҕа улахан махталбытын тиэрдэбит уонна үрдүк ситиһиилэри баҕарабыт!
Гимнастика курдук кыраһыабай көрүҥ Өймөкөөн улууһугар салгыы сайдан иһэригэр, бары усулуобуйа тэриллэн, элбэх оҕо баҕа санаата туоларыгар баҕарабыт!
Ольга Скрыбыкина