Соторутааҕыта Томтор нэһилиэгэр “Дьиэ кэргэн бастакы кэнсиэрэ” диэн дьоро киэһэ тэрээһиннээхтик ыытыллан, тэрийээччилэр дьон-сэргэ махталын ыллылар. СӨ үлэ бэтэрээнэ, Үөрэҕирии туйгуна, эргиччи талааннаах Наталья Скрыбыкина 60 сааһын туолбут үбүлүөйүнэн сибээстээн дьонугар-сэргэтигэр чугас дьонун кытта ырыа-тойук биэчэрин бэлэх ууннулар.
Манна Наталья Константиновна улахан уола Станислав кэргэнин Симонаны уонна үс оҕотун кытта Ленскэй куораттан ыалдьыттаатылар; кыыһа Сахайаана уонна Уолан Ивановтар кыыстарынаан Камилалыын, орто уол Матвей Скрыбыкин, Лилия, Оля Мочкиналар дьоро киэһэни кэрэ куоластарынан киэргэтэн, биир дойдулаахтарын биһирэбилин ыллылар.
«Харахпыт далыгар улааппыт оҕолорбут кэнсиэртэрэ сүрэхпитин уулларда, кэрэ киэһэни бэлэхтээтилэр. Өрөспүүбүлүкэҕэ биллэр-көстөр, идэлээх ырыаһыттартан туох да итэҕэһэ суохтар, өссө ордуктар да диэххэ сөп», – диэн көрөөччү астыммытын биллэрдэ.
Бу туһунан сиһилии “Хотугу сардаҥа” хаһыакка ааҕыҥ.
Евдокия Егорова