Дьокуускайга Дмитрий Коркин аатын үйэтитэр көҥүл тустууга норуоттар икки ардыларынааҕы турнир түмүктэннэ.
Саха сирин сүүмэрдэммит хамаандата икки кыһыл көмүс, биир үрүҥ көмүс уонна үс боруонса мэтээллэри ситистэ.
Ол курдук, финальнай киирсиигэ 61 киилэ ыйааһыҥҥа диэри Александр Авелов кыайыылааҕынан таҕыста. Кини Монголия бөҕөһүн Тувшинтулга Тумэнбилэги хотто.
Ону тэҥэ Лев Павлов Монголияттан сылдьар күүстээх спортсмены Мунх-Эрдене Батхуягы 57 киилэҕэ кыайан иккис кыһыл көмүс мэтээли Саха сирин хамаандатыгар аҕалла.
Онтон 74 киилэҕэ диэри ыйааһыҥҥа өссө биир кыһыл көмүс мэтээли Таджикистан сүүмэрдэммит хамаандатыгар аҕалла Саха сирин тустууга Виктор Рассадин.
«Биһиги өрөспүүбүлүкэбит спортсменнара сахалыы көҥүл тустуу оскуолатын чиэһин көмүскээтилэр. Биһиги кыһыл көмүһү ылбыт чемпионнарбытынан Лев Павловунан, Александр Авеловынан уонна Виктор Рассадинынан киэн туттабыт. Лев Павлов Коркин турнирыгар бу бастакытын кыайда, онтон Виктор Рассадин сэттис төгүлүн диэн бэлиэтиэхпин баҕарабын. Ис-сүрэхпиттэн турнир бука бары кыайыылаахтарын уонна призердарын эҕэрдэлиибин. Спорт бырааһынньыгын тэрийээччилэригэр, спортсменнарга уонна хамаандалар бэрэстэбиитэллэригэр үөрүүнү-көтүүнү бэлэхтээбиттэрин иһин махталбын тириэрдэбин», — диэн Ил Дархан Айсен Николаев эҕэрдэлээтэ.
Үрүҥ көмүс мэтээли 70 киилэ ыйааһыҥҥа Константин Капрынов ылла. Кини финалга Бурятия бөҕөһө Евгений Жербаевтыын киирсибитэ.
Бастакы боруонсаны Саха сиригэр Андрей Ленскэй аҕалла. Кини санааны уоскутар 86 киилэҕэ киирсиигэ Монголия чемпиона Батбилгуун Наадамбаты кытта көбүөргэ тахсыбыта.
Ыарахан 125 киилэ ыйааһыҥҥа боруонса мэтээли Никита Хабаров ситистэ. Кини биир дойдулааҕын Михаил Нестеровы кытта тустубута. Өссө биир боруонсаны 92 киилэҕэ Ньургун Сергин аҕалла.
Кыайыылахтарга 200 тыһ.солк. туттаран наҕараадалаатылар, үрүҥ көмүс призердарга — 100 тыһ.солк., боруонсаларга — 75 тыһ.солк. Чемпионнар тренердэригэр 50 тыһ.солк. суумалаах наҕарааданы туттардылар.
Көрөөччүлэргэ киирии билиэттэринэн сыаналаах бириистэри оонньоттулар. Тэрээһиҥҥэ хомуйуллубут үбү-харчыны анал байыаннай дьайыы кыттыылаахтарын өйүүргэ ыытыахтара.
Быйылгы турнирга Россия регионнарыттан уонна 12 тас дойдуттан 190 спортсмен кытынна. Кинилэр ортолоругар аатырбыт спортсменнар — аан дойду, Европа уонна Россия чемпиона Ахмед Усманов, аан дойду уонна Европа чемпиона, Россия түөрт төгүллээх чемпиона Абасгаджи Магомедов, Россия чемпиона уонна аан дойдутааҕы чемпионат призера Евгений Жербаев, Парижка ыытыллыбыт Олимпийскай оонньуулар кыттыылааҕа уонна аан дойдутааҕы чемпионат призера Эрназар Акматалиев.
Саха АССР, РСФСР, ССРС үтүөлээх тренера Дмитрий Петрович Коркин, кини иитиллээччилэрэ Роман Дмитриев, Павел Пинигин, Александр Иванов төрөөбүт өрөспүүбүкэлэрин аатын дойду үрдүнэн уонна аан дойдуга ааттаппыттара. Онон Саха сирэ көҥүл тустуу сайдыытын сүрүн кииннэриттэн биирдэстэрэ буолар. Бу маны үгэс быһыытынан Дьокуускай куоракка Д.П.Коркин аатын үйэтитэр норуоттар икки ардыларынааҕы турнир ыытыллара бигэргиир.
Ону таһынан, быйылгы турнир «Өрөгөй» спортивнай драма тахсыытын кытта сибээстээх. Хартыынаҕа Дмитрий Коркин Чурапчытааҕы спортивнай оскуола-интернат иитиллээччилэрэ улахан спортка тахсалларыгар толорбут оруолун сырдаталлар. Билэргит курдук, бу оҕолор — Роман Дмитриев, Павел Пинигин, Александр Иванов, Николай Захаров-Сахаачча уонна кинилэр үөлээннээхтэрэ. Кинилэр бастакы олимпийскай наҕараадалары ситиһэн Саха сирин спордугар улахан кылааты киллэрбиттэрэ. Үүнэр көлүөнэ тустууктара кинилэри холобур оҥостон билиҥҥи кэмҥэ спорт үрдүкү чыпчаалыгар үктэнэллэр. Киинэ премьерата алтынньы 17 күнүгэр киин куорат бары киинэ тыйаатырдарыгар көстүбүтэ. Режиссер: Михаил Лукачевскай.
«Саха» НКИХ
Хаартыска: Ольга Окоемова / «Якутия 24»