РФ Уһуйааччы уонна настаабынньык сылыгар сөп түбэһиннэрэн, 23 сыл педагогическай ыстаастаах, Үчүгэй орто оскуолатын үрдүк категориялаах алын кылааһын учууталын Евдокия Булдакова туһунан кэпсииргэ сананным.
Евдокия Ивановна үөрэтэр оҕолорун таптыыр, күннэтэ бэйэтин күүһүн-кыаҕын, сатабылын үөрэнээччилэри сайыннарыыга туһаайар. Кини билиини эрэ биэрээччи быһыытынан буолбакка, оҕону киһи быһыытынан үтүө майгылаах, аһымал санаалаах, ону сэргэ бэйэ бодотун тардынан, уопсастыбаҕа ытыктанар киһи буола үүнэригэр кыһаллан туран уһуйар.
Евдокия Ивановна биир идэлээхтэрин, үөрэнээччилэри уонна төрөппүттэри кытта биир тылы сатаан булар. Өр сыллаах үлэтэ үрдүктүк сыаналанан, Евдокия Булдакова СӨ үөрэҕирии туйгуна бэлиэни туппута да элбэҕи этэр.
Кини СӨ Үөрэх министиэристибэтин Бочуотунай грамоталарынан, Махтал суруктарынан хаста даҕаны бэлиэтэммитэ. Маны тэҥэ өрөспүүбүлүкэтээҕи, Бүтүн Арссыыйатааҕы педагогтарга аналлаах куонкурустарга ситиһиилээхтик кыттар.
Билигин устудьуоннуу сылдьар кини үөрэнээччилэрэ учууталларын туһунан санааларын истиэҕиҥ.
— Евдокия Ивановна биһиги олохпутугар суолтата улахан. Кини үтүө, холку майгылаах, тулуурдаах киһи. Кыра эрдэхпититтэн үтүөнү, мөкүнү араарарга үөрэппитэ. Биһигини төрөөбүт түөлбэҕититтэн тэйэн, киэҥ сиргэ таҕыстаххытына өрүүтүн сөптөөхтүк тутта-хапта сылдьарга сүбэлээн, дьоҥҥо үтүөтүк сыһыаннаһарбытыгар уһуйара, такайара.
Ис сүрэҕиттэн кыһаллан туран үөрэтэр, билиини биэрэр, оҕоҕо үтүө сыһыаннаах киһи. Кини уруоктара наар олус интэриэһинэй буолаллара. Биһигини араас таһымнаах куонкурустарга, олимпиадаларга кытыннарара. Онно чиҥэтэн туран, кыһамньылаахтык бэлэмниирэ.
Ол иһин оскуолаҕа үөрэнэ сылдьар кэммитигэр, билигин даҕаны кэккэ ситиһиилэрдээхпит.
Евдокия Ивановна урукку, билиҥҥи үөрэнээччилэрин төрөппүттэрэ оҕолорун кытта эмиэ толору сөбүлэһэллэр:
— Евдокия Ивановна сатабыллаах учуутал, оҕону бары өттүнэн сайыннарар үлэни көҕүлээн, кырачааннар үҥкүүлүүр, ыллыыр-туойар, олоҥхолуур, хоһоон ааҕар, кэпсиир дьоҕурдарын сайыннарар күрэстэргэ, билим ааҕыыларга о.д.а. кытыннарар.
Үс тылынан инсценировкалары туруорар, араас таһымнаах куонкурустарга кылааһы бүтүннүү хабан дьарыктыыр. Кини ыытар «Разговоры о важном» кылаас чааһын оҕолор олус сөбүлүүллэр. “Очумелые ручки» куруһуогар үөрэ-көтө сылдьаллар. Учуутал баар буолан, оҕо алыптаах муусука эйгэтигэр, уустук ахсаан суотугар, төрөөбүт төрүт тыл умсулҕаныгар эттиин-хаанныын уһуйуллар.
Биир дойдулаахтара Е.И. Булдакова учуутал быһыытынан өссө даҕаны сайдан, айымньылаахтык салгыы үлэлииригэр баҕарабыт.
Бу туһунан сиһилии “Хотугу сардаҥа” хаһыакка ааҕаарыҥ.
Аграфена Аммосова, биһиги общ.кор., Үчүгэй