Киһи бу орто туруу дойдуга кэлиэҕиттэн кэрэни эт кулгааҕынан истэн, илэ хараҕынан көрөн сыаналыырга үөрэнэр. Ол быһыытынан оҕону олох кыра эрдэҕиттэн муусуканы истэргэ үөрэтии эмиэ туспа талаан, сатабыл буолар.
Өймөкөөн нэһилиэгинээҕи 20 №-дээх “Чуораанчык” уһуйаанын музыкальнай салайааччыта Сардаана Аммосова бу эйгэҕэ үлэлээн кэлбитэ үйэ чиэппэрэ буолла. Кини үрдүк квалификациялаах педагог, СӨ Үөрэҕирии туйгуна. Сардаана Иннокентьевна иитиллээччилэрэ муниципальнайтан саҕалаан аан дойдутааҕы таһымҥа тиийэ араас музыкальнай күөн күрэстэргэ кыттыбыттара.
Соторутааҕыта “Чуораанчык” уһуйааҥҥа биир былааннаах тэрээһин хайдах ааспытын туһунан Сардаана Иннокентьевна маннык кэпсээтэ:
— Уһуйааммытыгар нэдиэлэ устата муусукаҕа сыһыаннаах араас тэрээһиннэр, дьарыктар буоллулар. Улахан бөлөх оҕолоро төрөппүттэрин кытта нуучча улуу классик-композиторын П.И. Чайковскай «Детский альбом» циклыгар киирэр айымньыларыттан сиэттэрэн, уруһуй күөн күрэһигэр кытыннылар. Оттон орто бөлөх оҕолоро эмиэ төрөппүттэринээн «Самодельные музыкальные инструменты» бырайыакка сатабылларын көрдөрдүлэр. Манна даҕатан эттэххэ, биһиги төрөппүттэрбит араас тэрээһиннэргэ өрүүтүн көхтөөхтүк кытталлар, эппиэтинэстээхтик сыһыаннаһаллар, кинилэр биһиги улахан тирэхпитинэн буолаллар.
Чөл күн (бээтинсэ) оҕолорго, төрөппүттэргэ анаан музыкальнай викторинаны, араас оонньуулары, күрэхтэри ыыттыбыт. Оҕолор төрөппүттэрин кытта дуоһуйа үҥкүүлээтилэр, астына ыллаатылар. Нэдиэлэ устата тэрээһиннэрбитигэр көхтөөхтүк кыттыбыт оҕолорбутугар, араас куонкурустарга кыайыыны ситиспиттэргэ Махтал суруктары, бириистэри туттардыбыт. Муусука нэдиэлэтэ ситиһиилэхтик түмүктэнэн, оҕолорбутугар өссө биир дьоллоох оҕо саас кэрэ-бэлиэ күнүн хааллардаҕа диэн саарбахтаабаппыт.
Манна даҕатан эттэххэ, Өймөкөөн нэһилиэгин килбэйэр киинигэр турар, ыалдьыттар, туристар болҕомтолорун тардар “Кыайыы искибиэрэ” Сардаана Аммосова бырайыагынан тутуллубута кэрэхсэбиллээх. Кини маны таһынан үҥкүүлүүрүн, успуордунан дьарыктанарын сөбүлүүр. С.И. Аммосова остуол тенниһинэн үлүһүйэн туран дьарыктанар. Араас таһымнаах күрэстэргэ кыттан хаста эмэ бириистээх миэстэлэри ылары ситиспитэ.
Дэгиттэр талааннаах киһи иитэр, уһуйар оҕолоро кэрэни кэрэхсии, сырдыгы сыаналыы улаатан, дьоһун олохтоох дьон буола улааттыннар.
Любовь Кривошапкина