Томороон, чысхаан тымныы тыыннаах ахсынньы ый түмүктэнэрэ бу тиийэн кэллэ. Бу кэмҥэ Саҥа дьыл үөрүүлээх бырааһынньыга хас биирдии дьиэ кэргэҥҥэ кэтэһиилээх, алыптаах түгэн буоларын бары да билэбит.
Биэрэк Үрдүн «Чуораанчык» уһуйаан иитиллээччилэрэ Саҥа Дьыл бырааһынньыгын көрсөөрү, Моруос оҕонньорго бэлэхтэрин бэлэмнээн, номнуо күүтэ-кэтэһэ сылдьаллар. Кэтэһиилээх бырааһынньык иһэрэ дьиэ таһыттан көстөр. Уһуйаан тэлгэһэтигэр сылын ахсын төрөппүттэр көҕүлээһиннэринэн саҥа дьыллааҕы харыйаны симииллэр. Быйыл да үгэс быһыытынан ийэлэр, аҕалар бэртээхэй араас чаҕылхай уотунан киэргэтэн, оҥорон биэрдилэр. Харыйабыт дьэрэкээн өҥүнэн оонньуура, ыраахтан сандаара тыгара киһи хараҕын сымнатар, дууһатын үөрдэр. Оттон оҕочооннорбут уһуйааннарын түннүктэригэр араас хаар оһуордары уруһуйдаан, ойуулааан-мындырдаан киэргэппиттэр.
Кинилэр ырыаларын-хоһоонорун, үҥкүүлэрин-битиилэрин күн аайы бэлэмнэнэн, уһуйаан олоҕо күөстүү оргуйар. Онон кэтэһиилээх, алыптаах бырааһынньыгы көрсөөрү, кырачааннар биир да күнү көтүппэккэ, уһуйааннарыгар үөрэ-көтө кэлэллэр.
Убаастабыллаах төрөппүттэрбитигэр, оҕолоргут туһугар кыһамньыгыт иһин, уһуйаан кэлэктиибин аатыттан улахан махталбытын тиэрдэбит. Эһиэхэ кэлэр сылга чэгиэн туругу, дьолу, ситиһиилээх –таһаарыылаах үлэни баҕарабыт.
Марта СМИРНОВА,
«Чуораанчык» уһуйаан иитээччитэ,
Биэрэк Үрдэ