Кыһыҥҥы туризм бэстибээлэ элбэх туриһы түмтэ

Ааспыт өрөбүллэргэ   «Тымныы полюһа – Өймөкөөн»  кыһыҥҥы туризм бэстибээлэ  үрдүк таһымнаахтык буолан ааста.

Сүрүн тэрээһиннэртэн Томторго урбаанньыттар пуорумнара уонна Үчүгэйгэ — Табаһыт күнэ буолан ааста. Улуус нэһилиэктэрин урбаанньыттара бэйэлэрин үлэлии сылдьар хайысхаларынан бэрт сонун бырайыактары көмүскээтилэр. Оттон Үчүгэйгэ ыытыллыбыт Табаһыт бырааһынньыга «Үчүгэй» ААУо тэриллибитэ 35 сылын чэрчитинэн ыытылынна.

СӨ туристическай ааҕыныстыбатын салайааччытын э.т. Аркадий Ксенофонтов кыһыҥҥы туризм бэстибээлин туһунан бэйэтин санаатын үллэһиннэ:

Улуус урбаанньыттара бэрт кэскиллээх бырайыактарынан үлэлииллэр эбит да, документацияны толорууга, үбүлээһин, нолуок боппуруостарыгар ыарырҕаталлар эбит. Бу туһунан стратегическай сиэссийэ ыыта сылдьан, урбаанньыттар санааларын истэн түмүк оҥордубут. Онон бу пуорум түмүгүнэн киирбит чопчу этиилэринэн анал исписэлиистэри ыытан араас сэминээрдэри, үөрэхтэри тэрийиэхпит.

Кэлэр сылларга бэстибээли үс сиринэн ыытарга толкуйданыыһыбыт. Ол курдук, үгэс быһыытынан ыытыллар Томтор нэһилиэгэр аҥардас дьону түһэрэр гостиница да элбээбитинэн түмүк оҥордоххо, атын да нэһилиэктэргэ бу хамсааһыны эмиэ олохтуохха наада. Ол курдук, быйыл кэлбит турист үксэ тоҕо Өймөкөөҥҥө туох да ыытыллыбатаҕын туоһулаһар.

Чысхаантан Тымныы полюһугар сылдьыбыттарын туһунан сэртипикээттээх Тымныы оҕуһун иннигэр хаартыскаҕа түһүөн баҕалаах киһи үгүс эбит. Онон бу өрүтү учуоттаан, эһиил Өймөкөөн нэһилиэгэр бэстибээл биир күнүн эмиэ аныыһыбыт.  Онуоха  кэккэ төрүөт баар. Манна олохтоохтор саха сылгытын базатын көрдөрөн,  туристарга кыһыҥҥы сөтүө курдук кэрэхсэтэр кэккэ өҥөнү оҥорон, уопутурбуттара ырааппыт. Урбаанньыт Тамара Васильева аатын ааттаан кэлэн, араас омук туриһа тоҕуоруһар нэһилиэгэ.

Оттон бары өттүттэн дэгиттэр талааннаах мас уонна тимир ууһа, худуоһунньук, ырыаһыт, мелодист, фотограф, Чысхаан брендин сайыннарааччы култуура управлениетын методиһыгар Семен Сивцевкэ-Өймөкөөн Сэмэнигэр  туристарга тэрийбит бэртээхэй «Тымныы полюһа» хаартыска Галереята өрөспүүбүлүкэ  туристическай реестрыгар киирбитин туоһулуур докумуону бу тиийэ сылдьан анаан туттардыбыт.

Үчүгэйгэ Табаһыт күнүн, табаһыттар күрэстэрин ыытыы олус наадалаах эбит. Туристар бу тэрээһини олус астына көрдүлэр-иһиттилэр. Ол курдук, Индияттан тиийэ кэлбит буоллахтарына, 30-ча турист дойду араас эрэгийиэннэриттэн кэлбит.

 Онон быйылгы бэстибээлгэ, төһө да айаҥҥа уустуктар үөскээбиттэрин иһин (халыҥ хаар халҕаһата айан суолун бүөлээбитэ), 700-тэн тахса киһи кыттыыны ылбыта, бу тэрээһин олус кэскиллээҕин туоһута.  «Тымныы полюһа — Өймөкөөн»  бэстибээл  «Кыһын Саха сириттэн саҕаланар», «Саха сирин амтана» курдук кыһыҥҥы туризм  суолталаах тэрээһиннэрин  биир бастыҥ көрүҥүн быһыытынан сайыннарар соруктаахпыт.

Маныаха Ил Дархан Айсен Николаев бу күннэргэ туризм туһунан таһаарбыт ыйааҕа төһүү өйөбүлүнэн буолуоҕа.

Елена Потоцкая

Читайте дальше