Биһиги бүгүҥҥү ыалдьыппыт — сүрэҕин баҕатынан иистэнэр, сахалыы моһуоннаах эгэлгэ киэргэли оҥорор Марианна Тырылгина. Кини Өймөкөөн нэһилиэгэр оҕо иитиитигэр олоҕун үксүн анаабыт киһи.
Марианна Ивановна оҕо сааһын, оскуолатааҕы сылларын умнуллубат түгэннэрин туһунан маннык кэпсиир:
- Мин Аллараа Халыма улууһун Черскэй бөһүөлэгэр күн сирин көрбүтүм. 4 саастаахпар Өймөкөөҥҥө көһөн кэлбиппит. Ийэм Мария Семеновна Вензель, аҕам Халыматтан төрүттээх Иван Иванович Тырылгин этилэрэ. Тапталлаах ийэм сырдык иэйиитинэн араҥаччыланан, дьоллоох оҕо саас диэни билэн улааппытым. Күн күбэй ийэм Мария Семеновна Вензель үүнэр көлүөнэни иитиигэ-үөрэтиигэ 40-ча сыл таһаарыылаахтык үлэлээбитэ-хамсаабыта. Кини СӨ үөрэҕириитин туйгуна, үлэ бэтэрээнэ этэ.
Мин М.А. Шолохов аатынан Москубатааҕы государственный гуманитарнай университекка логопед-уһуйааччы идэтин кэтэхтэн үөрэнэн бүтэрбитим. Онтон бу университет Дьокуускайдааҕы филиалыгар үөрэнэн, социальнай педагог идэтин баһылаабытым. Бу идэбинэн 10-ча сыл үлэлээбитим. “Сайдам” дьиэ кэргэҥҥэ уонна оҕоҕо социальнай көмө киинигэр иитээччинэн үлэлии сылдьыбытым, кэлин уһуйааҥҥа эмиэ үлэлээбитим. Онтон 2019 с. оскуола интэринээтигэр көһүөхпүттэн ыла күн бүгүҥҥээҥҥэ дылы манна үлэлии сылдьабын, психолог идэтигэр хаттаан үөрэниини ааспытым.
Иллэҥ кэммэр дьарыгым элбэх. Иистэнэбин, оҕуруонан тиһэбин, киэргэл оҥорон атыылыыбын. Араас матырыйааллартан суумкалары, олбохтору тигэбин. Сахалыы ыаҕыйалары, оҕуруо угар хоруопкалары оҥоробун. Өссө пакеттартан араас дьэрэкээн сибэккилэри айан таһаарабын.
Дьикти интэриэһинэй дьарыктаах М.И. Тырылгина туһунан «Хотугу сардаҥа» хаһыакка сиһилии ааҕаарыҥ.
Евдокия ЕГОРОВА