Учуутал идэтэ — суолдьут сулус, умуллубат чүмэчи. Билиигэ-көрүүгэ, сырдыкка тардыһыы, сайдыы-үүнүү хайа да үйэҕэ баар уларыйбат ирдэбилинэн буолар.
Бүгүҥҥү ыалдьыттарбыт — П.В. Заболоцкай аатынан Үчүгэй орто оскуолатын эдэр учууталлара.
Намыына Соловьева, нуучча тылын уонна литирэтиирэтин учуутала:
— Мин М.К. Аммосов аатынан ХИФУ-ну 2024 сыллаахха бүтэрбитим. Нуучча тылын уонна литэрэтиирэтин кафедратыгар үөрэммитим. Мин баҕа санаабын толорон, үөрэхпин бүтэрэн, учуутал идэтин баһылаабытым уонна хотугу ыраах, үтүөкэн дьоннордоох Үчүгэй нэһилиэгэр үлэлии кэлбитим. Манна миигин эдэр учууталлар уопсайдарыгар олохтообуттара. Бу оскуолаҕа үлэлээбитим иккис сыла буолан эрэр. Биһиги кэлэктииппит эдэр, эрчимнээх, күүстээх, дьулуурдаах учууталларынан толору. Дириэктэрбит Валентина Карпова салайааччы быһыытынан эдэр уһуйааччыларга өрүүтүн сүбэ-ама биэрэр, баай уопутуттан үллэстэр.
Мин санаабар, учуутал, бастатан туран, идэтигэр бэриниилээх уонна киэҥ билиилээх, дэгиттэр сайдыылаах, дириҥ толкуйдаах буолуохтаах. Кини анала — үүнэр көлүөнэҕэ сиэри-туому тутуһууга, үтүө майгылаах буолууга, билиигэ-көрүүгэ тардыһыыга муударай сирдээччи буолууга сытар.
Түгэнинэн туһанан, биир идэлээхтэрбин уонна миигин үөрэппит учууталларбын, преподавателлэрбин Учуутал күнүнэн истиҥник эҕэрдэлиибин.
Бетта-Хан Власова, алын кылаас учуутала:
— Мин төрөөбүт төрүт дойдум — Мэҥэ-Хаҥалас улууһун Доллу нэһилиэгэ. Евдокия, Никифор Власовтар дьиэ кэргэнигэр төрдүс оҕонон күн сирин көрбүтүм. Бииргэ төрөөбүт алтыабыт. Ийэм «Тумул» кэпэрэтиипкэ ыанньыксытынан үлэлиир. Аҕам олох-дьаһах коммунальнай хаһаайыстыбатыгар үлэлээбитэ, билигин бочуоттаах сынньалаҥҥа олорор.
Мин төрүттэрбэр учуутал идэлээхтэр элбэхтэр. Ол иһин мин алын кылааска үөрэнэ сылдьыахпыттан учуутал буолар баҕа санаалаах этим. Оскуолабын бүтэрэн баран Н.Г. Чернышевскай аатынан Бүлүүтээҕи педагогическай кэллиэскэ устудьуоннуу киирбитим.
Үөрэхпин бүтэрэн баран сахалартан бастакы Сэбиэскэй Сойуус дьоруойа Ф.К. Попов аатынан Баатара орто оскуолатыгар идэбинэн, алын кылаас учууталынан, үлэбин 2020 с. саҕалаабытым.
Былырыын 2024 с. Өймөкөөн улууһун Үчүгэй нэһилиэгэр иүлэлии кэлбитим.
Хас биирдии учуутал үлэлиирин тухары үөрэнэр, элбэх саҥаны арыйарга дьулуһар. Ол курдук мин ситиһиилэрим туһунан кылгастык билиһиннэрдэххэ, 2022 с. эдэр учууталлар өрөспүүбүлүкэтээҕи куонкурустарыгар кыттан «Билиигэ дьулуһуу» номинацияҕа тиксэн наҕараада ылбытым. Оттон V-с «Эдэр иитээччи — 2024» педагогическай маастарыстыба үбүлүөйдээх муниципальнай куонкуруһар «Педагогическай дебют» номинация хаһаайына буолбутум.
Евдокия Егорова