Хорсун буойуну өрүү саныахпыт, киэн туттуохпут!

Тохсунньу 17 күнүгэр Дьокуускай куоракка «Атриум» траурнай саалаҕа анал баһыаннай дьайыы кыттыылааҕа, «Эр санааланыы» уордьан кавалера, биир дойдулаахпыт, иллээх ыал тапталлаах оҕото, тапталлаах кэргэн, аҕа, Сордоҥноох нэһилиэгиттэн төрүттээх Готовцев Максим Владимировиһы кытта быраһаайдаһыы буолан ааста.

М.В. Готовцевы тиһэх суолга атаарыы сиэрин-туомун саҕаланыытыгар байыаннай караул арыаллаах уолбутун киллэрдилэр. Байыаннай комиссариат бэрэстэбиитэлэ Николай Гребенников быраһаайдаһыы тылын эттэ, Максим Владимирович кэриэһигэр кутурҕан иһийиини биллэрдэ. Мустубут биир дойдулаахтара уолбутун сүһүөхпүтүгэр туран кэриэстээтибит.

Саха Өрөспүүбүлүкэтин Бырабыыталастыбатын аатыттан Экология уонна айылҕа харыстабылын миниистирин солбуйааччы Андрей Коноплев, Ил Түмэн тутууга уонна сокуону оҥорууга кэмититиэтин солбуйааччы Афанасий Владимиров сэрии толоонугар олоҕун толук уурбут хорсун буойун туһунан истиҥ-иһирэх тылларынан аҕыннылар, бокуонньук чугас дьонугар, биир дойдулаахтарыгар дириҥ кутурҕаннарын тиэртилэр.
Бу кутурҕаннаах күҥҥэ буойун Готовцев М.В. үлэлээбит «Теплоэнергосервис» АО генеральнай дириэктэрэ Максим Трофимов кэриэстэбил тылы эттэ. Бу тэрилтэ хас биирдии анал байыаннай дьайыыга сылдьар үлэһиттэригэр, кинилэр дьиэ кэргэттэригэр тустаах көмөнү оҥороллорун иһитиннэрдэ.
Траурнай саалаҕа мустубут аймахтара, доҕотторо Максимы иһирэх тылларынан ахтан-санаан тиһэх суолугар атаардылар.


Анал байыаннай дьайыыга эйэлээх олох иһин сырдык тыынын толук уурбут биир дойдулаахпыт Готовцев Максим Владимирович чугас дьонугар, дьиэ кэргэнигэр, оҕолоругар, аймах-билэ дьонугар, доҕотторугар дириҥ кутурҕаммытын тиэрдэбит. Сордоҥноохтор хорсун буойуну өрүү саныахпыт, киэн туттуохпут, махтаныахпыт.

Биир дойдулаахтар ааттарыттан Мария МАКСИМОВА, улуустааҕы култуура Управлениетын начаалынньыгын солбуйааччы

Сиһилии «Хотугу сардаҥа» хаһыатыгар ааҕыҥ