Мария уонна Рустам Гарифуллиннар дьиэ кэргэннэрин туһунан улууска билбэт киһи ахсааннаах буолуо. Элбэх оҕолоох ыал хаһаайката Мария Владиславовна Үчүгэй нэһилиэгиттэн төрүттээх. Кэргэнинээн Рустам Фаритовичтыын 2015 сылтан урбаанынан дьарыктаналлар.
Кинилэр улууска муниципальнай суолу-ииһи оҥорууга бэдэрээтчитинэн үлэлээбиттэрэ хаһыс даҕаны сылыгар барда. Маны таһынан Гарифуллиннар сүөһү иитиитинэн эмиэ дьарыктаналлар.
Бу күннэргэ урбаанньыт дьиэ кэргэн биригээдэтэ Төрүт нэһилиэгэр үлэлии-хамсыы сылдьар.
Биһиги “Төрүт нэһилиэгэ” СП дьаһалтатын баһылыгын Алексей Кондаковы кытта сибээстэһэн ол туһунан сырдатарыгар көрдөстүбүт:
— Гарифуллиннар 4 киһилээх биригээдэлэрэ нэһилиэккэ балаҕан ыйын саҥатыттан үлэлиир. Кинилэр бу кэмҥэ Төрүт нэһилиэгэр диэри муниципальнай суолу оҥордулар. Ол кэнниттэн Индигир өрүскэ барар, бөһүөлэк иһинээҕи суолга элбэх үлэни ыыттылар. Ону тэҥэ биригээдэ бөһүөлэк киинигэр быраҕыллыбыт үс дьиэни көтүрэн, тас көстүүнү тупсарыы үлэтигэр төһүү көмө буоллулар. Эргэ сыбаалканы бүтүннүү ыраастаан суох оҥордулар. Ол оннугар билигин олохтоохтор бөҕү-сыыһы таһаарар сирдэрин иэнин кэҥэтэн, күүстээх үлэ барда.
Маны да таһынан биригээдэ оҥоруохтаах үлэтэ үгүс, кэккэ боппуруостар, харчы-үп көрүллүүтэ быһаарылыннар эрэ, дуогабардаспыт үлэлэрин салҕыы оҥорорго бэлэмнэр. Ол курдук хас даҕаны сиринэн ууну аһардар турбалары ууруохтара, ханаабалары хастарыахтара уонна бөһүөлэк иһинээҕи муосталары өрөмүөннүөхтэрэ.
Гарифуллиннар маныаха барытыгар тус тиэхиньикэлэрин туһаналлар – бульдозер, экскаватор уонна икки самосвал көлөлөөхтөр.
Мария Гарифуллина кэпсээбитинэн, ИП “Рафаил Гарифуллин” (кэргэнин бииргэ төрөөбүтэ) биригээдэтэ улууска муниципальнай суолу көрүүгэ-истиигэ аукциоҥҥа кыттан бэдэрээтчит быһыытынан Төрүт нэһилиэгэр 5-с сылын үлэлиир.
Маны тэҥэ кинилэр Өймөкөөн уонна Сордоҥноох нэһилиэктэрин суолларын муниципальнай чааһын көрөллөр-истэллэр. Онон бэдэрээтчит Гарифуллин биригээдэтэ ахсынньыттан муус устарга дылы бу нэһилиэктэр суолларыгар тустаах үлэни ыытыахтаах кэмэ чугаһаата.
Сэтинньи бастакы дэкээдэтигэр Төрүт нэһилиэгэр ылыммыт соруктарын толорон баран, Үчүгэй нэһилиэгэр бу сайын уу сууйбут суолун кутар былааннаахтар, Томтор нэһилиэгэр урукку оскуола уонна остолобуой эргэрбит дьиэлэрин көтүрэн, оннун ыраастаан бэлэмнииргэ дуогабардаспыттар. Онтон салҕыы Өймөкөөн нэһилиэгэр тиийэн саҥа оҕо былаһаакката тутуллар сирин бэлэмниэхтэрэ.
Ити курдук Гарифуллиннар дьиэ кэргэн сылы төгүрүччү үлэ үөһүгэр сылдьаллар.
Бу туһунан сиһилии “Хотугу сардаҥа” хаһыакка ааҕыҥ.
Хаартыскалары А. Кондаков тиксэрдэ.
Любовь Кривошапкина