Томтордооҕу Оҕо-спортивнай оскуолатын хотугу многоборье тириэньэрэ Николай Софронов иитиллээччилэрэ сайыҥҥы сынньалаҥы туһалаахтык атааралларын сатабыллаахтык тэрийдэ.
Николай Софронов футбол курдук умсугутуулаах көрүҥҥэ бэс ыйыттан саҕалаан оҕолору дьарыктаабыта. Ону таһынан үүнэн эрэр спортсменнарга хотугу многоборье көрүҥнэрин эмиэ билиһиннэрэр. Дьарык иитинэн ыытыллыбыт күрэхтэһиигэ сүрүн бириистэри Николай Николаевич бэйэтэ туруоран, оҕолорго араас көрүҥнэргэ күөн көрсүү олус тыҥааһыннаахтык ааспыта.
Томтордооҕу Оҕо-спортивнай оскуолата оҕолор успуорт араас көрүҥнэринэн дьарыктаналларыгар сөптөөх усулуобуйаны тэрийэрин бэлиэтиир тоҕоостоох.
Төрөппүттэр уонна оҕолор Николай Николаевичка улахан махталларын тиэрдэллэр. Ытыктабыллаах тириэньэр өрүү бу курдук үүнэр көлүөнэни успуорт эйгэтигэр сыһыаран чөл, доруобай сылдьарыгар баҕараллар.
Бу туһунан сиһилии “Хотугу сардаҥа” хаһыакка ааҕыҥ.
Матрена Петрова, учуутал,
Томтор