Игорь Васильевич Өймөкөөн улууһугар үлэлии кэлиэр диэри Ленскэй оройуонугар полиция начаалынньыгын солбуйааччытынан үлэлээбитэ. Бу иннинэ өрөспүүбүлүкэ Арктическай улуустарыгар эмиэ өр сыллар усталарыгар сулууспалаабыта, Саха сирин ИДьМ аппаратыгар таһаарыылаахтык экэнэмиичэскэй хайысхаҕа эппиэттээх дуоһунаска сылдьыбыта. Онон кини салайар үлэҕэ уонча сыл сылдьыбыт, экэнэмиичэскэй хайысханан бэрээдэги уодьуганнааһыҥҥа уопуттаах үлэһит. И.В. Павлов бэрээдэги араҥаччылыыр сулууспаҕа уопсайа 30-н тахса сыл үлэлээн кэллэ.
Игорь Павлов орто оскуоланы Мэҥэ Хаҥалас оройуонун Майа сэлиэнньэтигэр бүтэрбитэ, ол кэнниттэн аармыйаҕа сулууспалаабыта. Онтон орто анал үөрэххэ киирэн, юрист идэтин баһылаабыта. Ол кэнниттэн үөрэҕин институкка үрдэтиммитэ.
— Мин тыа сиригэр төрөөбүт буолан, оҕо эрдэхпиттэн ыарахан үлэҕэ эриллэн улааппытым, — диэн кэпсиир И.В. Павлов. – Төрөппүттэрим олус үлэһит дьон этилэрэ. Ийэм үйэтин тухары оҕо иитиитин эйгэтигэр үлэлээбитэ, кини оҕо саадыгар иитээччинэн үлэлээн баран, кэлин бу тэрилтэни салайбыта. Оттон аҕабыт тырахтарыыс этэ. Кини Сэбиэскэй Сойуус эстибитин кэннэ сылгы иитиитинэн дьарыктаммыта, Дьөһөгөй оҕотун 15 сылы быһа көрбүтэ-истибитэ. Хомойуох иһин, кини билигин биһиги аттыбытыгар суох, олохтон эрдэ барбыта.
Биһиги бииргэ төрөөбүт үһүөбүт. Бары хара үлэҕэ сыстан улааппыппыт – оттоон-мастаан, үлэ лааҕырдарыгар уһун сайыны быһа үлэлээн. Онон билигин ханнык даҕаны уустук үлэттэн чаҕыйбаппын. Маныаха төрөппүттэрбэр махталым муҥура суох. Кинилэр биһигини олох очурдарын этэҥҥэ ааһарбыт туһугар үлэнэн ииппиттэрэ, — диэн кэпсиир Игорь Васильевич.
И.В. Павлов бу сыллар усталарыгар Индигир бөлөх улуустарыгар (Өймөкөөн, Абый, Муома) эрэ сылдьыбатах эбит. Онон Өймөкөөҥҥө кэлээт кини бу дойду кэрэ айылҕатын олус сэргээбит, сөбүлээбит. Быыс буллар эрэ, халлааҥҥа харбаһар хайаларга дабайар санаалаах.
— Манна бырамыысалыннас улууһа буолан, көмүс хостуур тэрилтэлэр учаастактара элбэх. Онон Өймөкөөн улууһугар Арассыыйа атын эрэгийиэннэриттэн, тас дойдулартан үгүс киһи вахтовай ньыманан үлэлии кэлэрэ бэлиэтэнэр. Мин улууска үлэлии кэлбитим үс нэдиэлэ кэриҥэ буолла. Бу кэм устата дьону-сэргэни кытта алтыстым. Олохтоохтор биир үксүн элэккэйдэр, — диэн санаатын үллэстэр ИДьО салайааччыта И. Павлов. – Бу дуоһунаска киирэн баран мин сүрүн сорукпунан Өймөкөөн улууһун нэһилиэнньэтин олоҕун араҥаччылааһын, буруйу оҥорууну уодьуганнааһын буолар, — диэтэ Игорь Васильевич.
Өймөкөөн улууһугар уһун ардахтар кэннилэриттэн улахан уу тахсан, ыксаллаах быһыы-майгы биллэриллибитэ. Халаан уутуттан эмсэҕэлээбит дьону-сэргэни өйүүргэ, кинилэргэ күүс-көмө буоларга тустаах миэрэ ылыллара биллэр. Өймөкөөн улууһунааҕы Ис дьыала салаатын үлэһиттэрэ начаалынньык И.В. Павлов бачыымынан бу дьыалаттан туора турбатылар.
Бастакытынан, улуустааҕы полиция салаатын икки үлэһитэ Томтор уонна Өймөкөөн нэһилиэктэригэр тиийэн тустаах эбээһинэстэрин толороллор, уопсастыбаннай бэрээдэги араҥаччылыыллар.
Билигин ууттан эмсэҕээлэбит нэһилиэктэри чөлүгэр түһэрии үлэтэ күргүөмнээхтик бара турар, ыраахтан-чугастан үтүө көмөһүттэр, тутуу биригээдэлэрэ о.д.а. улууска кэллилэр. Онон полиция үлэһиттэрин быһаччы эбээһинэстэринэн общественнай бэрээдэги хааччыйыы буолар.
Маны тэҥэ полиция үлэһиттэрэ харчы хомуйан, көмө пуондатыгар тиэрдибиттэрэ.
— Уустук, ыарахан кэмҥэ биһиги дьоммутун-сэргэбитин кытта бииргэ буолуохтаахпыт, кыах баарынан өйүөх тустаахпыт. Полиция дьону-сэргэни кытта аһаҕас кэпсэтиигэ өрүү бэлэм, — диэн И.В. Павлов түмүктээтэ.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина