Арассыыйаҕа дьиэ кэргэн сылын чэрчитинэн Өймөкөөн сэлиэнньэтин «Тымныы полюһа» култуура дьиэтигэр «Тыа сирин бастыҥ ыала-2024» күрэх түмүктэннэ. Куонкуруска Үчүгэй, Томтор, Өймөкөөн, Хара Тумул, Биэрэк Үрдэ уонна Сордоҥноох сэлиэнньэлэриттэн ынах сүөһү, сылгы, таба иитиитинэн уонна урбаанынан дьарыктанар алта дьиэ кэргэн кыттыыны ылла.
Күрэҕи улуустааҕы култуура уонна туризм салалтата, «Өймөкөөн тымныы полюһа» муниципальнай тэриллии уонна «Тымныы полюһа» Өймөкөөн сэлиэнньэтин култууратын дьиэтэ иилээн-саҕалаан тэрийдилэр. Бигэргэммит балаһыанньа быһыытынан, кыттааччылар 4 түһүмэҕи аастылар. Ол курдук бэйэлэрэ оҥорон таһаарар бородууксуйаларын, табаардарын уонна дьиэ кэргэн сөбүлүүр бүлүүдэтин дьон көрүүтүгэр-истиитигэр таһаардылар. Ону тэҥэ дьиэ кэргэн тугунан дьарыктанарын, дохуоттанарын, дьиэ кыылын иитиигэ туһанар кистэлэҥнэрин кэпсээтилэр.
Күрэх түмүгүнэн «Урбаан бастыҥ ыала» — Томтор сэлиэнньэтиттэн Мария уонна Айаал Неустроевтар; «Сүөһү иитиитинэн дьарыктанар бастыҥ дьиэ кэргэн» — Сордоҥноохтон Августа уонна Владимир Винокуровтар;
«Сылгы иитиитинэн дьарыктанар бастыҥ дьиэ кэргэн» — Өймөкөөн сэлиэнньэттэн Татьяна уонна Михаил Итегеловтар;
«Таба иитиитинэн дьарыктанар бастыҥ дьиэ кэргэн» — Үчүгэй сэлиэнньэтиттэн Сардана Громова дьиэ кэргэнэ;
«Бэйэ бородууксуйатын оҥорон таһаарар бастыҥ дьиэ кэргэн» — Хара-Тумул сэлиэнньэтиттэн Елена уонна Алексей Аммасовтар дьиэ кэргэттэрэ буоллулар.
«Тыа сирин бастыҥ ыала — 2024» күрэх муҥутуур кыайыылаахтарынан Биэрэк Үрдүн биир бастыҥ ыала Надежда уонна Иван Слепцовтар ааттаннылар. Кинилэргэ «Өймөкөөн улууһун үгэстэрин илдьэ сылдьар бастыҥ дьиэ кэргэн» диэн үрдүк аат иҥэрилиннэ.
Куонкурус кыайыылаахтара уонна анал ааттары ылбыт дьиэ кэргэн дьупулуомунан итиэннэ харчынан наҕараадаланнылар.
«Куонкурус кыттыылаахтара бары да олус үчүгэйдэр этэ. Ол иһин кыайыылаахтарынан Слепцовтар дьиэ кэргэттэрэ буоллулар, диэн биллэрбиттэригэр биһиги соһуйбуппут даҕаны, үөрбүппүт даҕаны», — диэн Надежда Константиновна санаатын үллэстэр. Слепцовтар дьиэ кэргэттэрэ «Өймөкөөн улууһун үгэстэрин илдьэ сылдьар бастыҥ дьиэ кэргэн» диэн ааты ылбыттара, кырдьык да оруннаах. Надежда Константиновна уонна Иван Гаврильевич Слепцовтар — 39 сыл анараа өттүгэр бур-буруо таһааран, алаһа дьиэ тэринэн олоруохтарыттан ыла, илиилэрин ынах сүөһү, сылгы иитииттиттэн араарбатах ыал. Бүгүҥҥү күҥҥэ 6 ыанар ынахтаахтар, сылгы үөрдээхтэр. Кинилэр уһун кыһын кэннэ, саха сиэринэн, хас сайын аайы «Өбүгэ» диэн бэлиэ ааттаах сайылыктарыгар оҕолорун, сиэннэрин илдьэ, көһөн бараллар. Манна сайын устата оттоон, отонноон, үлэлээн-хамсаан, үрүҥ илгэни дэлэйдик үрүлүтэллэр. «Сайылыктаммыппыт 25 сыл буолла, бөһүөлэктэн 2,5 көс тэйиэс турар. Бэс ыйыгар сүөһүлэрбит сайылыктарын диэки бэйэлэринэн барар идэлээхтэр. Кинилэр кэннилэриттэн биһиги дьэ көһөбүт. Сүөһүлэрбитин хаһан да күүспүтүнэн үүрэн илдьибэппит. Уопсайынан, сүөһү олус өйдөөх, саҥарбат эрэ «буруйдаах», — диэн маанылаах хаһаайка кэпсиир. Надежда Константиновна этэринэн, сүөһүнү хоту улаахтык иитииргэ ыам бириэмэтин булгуччу, олоххо буолар араас түгэннэри аахсыбакка, куруук тутуһуллуохтаах. Оччоҕо эрэ ситиһии баар буолар.
Бигэ туруктаах тыа ыалын тулхадыйбат тутах киһитэ Иван Гаврильевич Биэрэк Үрдэ бөһүөлэккэ, арааһа, бу күҥҥэ бары үлэҕэ барытыгар ат мииммитинэн сылдьар соҕотох киһи буолуохтаах. Маны таһынан кини тириини, тыһы кыһыахтыыр, таҥастыыр, имитэр уонна этэрбэс улларыытынан дьарыктанар. Ол кэннэ кэргэнэ Надежда Константиновна — тирииттэн, тыстан, түүлээхтэн кэтэр таҥас арааһын, сахалыы тыыннаах кэргэл, сувенир эгэлгэтин тигэн таһаарар сатабыллаах иистэнньэҥ.
Слепцовтар аана-ахса биллибэт дьиэтээҕи түбүктэн быыс булан, нэһилиэккэ, улууска ыытыллар култуурунай да, спортивнай да күрэхтэртэн, үтүө дьыала аахсыйалартан туора турбакка, куруук көхтөөхтүк кытталлар. Кинилэр 3 оҕолорун кыра саастарыттан үлэҕэ, олоххо актыыбынай буоларга батыһыннара сылдьан үөрэппиттэрэ, билигин 7 сиэннэрин ураты, ол эрээри бэйэтэ туспа кэрэлэрдээх тыа сирин олоҕор-дьаһаҕар уһуйаллар.
Бэйэбит ааппытыттан Надежда Константиновна уонна Иван Гаврильевич Слепцовтары итиэннэ куонкурус бары кыттыылаахтарын кэлэн иһэр саҥа дьылынан эҕэрдэлиибит. Бука бары чэгиэн туруктаах сылдьыҥ, үлэҕит-хамнаскыт таһаарыылаах, үтүө түмүктэрдээх буоллун, дьиэ кэргэҥҥитигэр ил-эйэ, таптал эрэ тосхойдун!
Светлана НИКИФОРОВА