Самаан сайыммыт кылгас кэрэ кэмнэрин оҕолор туһалаахтык атааралларын туһугар Тымныы полюһугар оскуола иһинэн араас лааҕырдар тэриллэн таһаарыылаахтык үлэлииллэр.
Ол курдук, Сордоҥноох орто оскуолатын иһинэн “Мичээр” уонна “Чолбон” лааҕырдар аһыллыбыттара. Лааҕыр хас биирдии күнэ хатыламматын, интэриэһинэйдик ааһарын туһугар учууталлар Александра Вензель уонна Наталья Вензель туруулаһан үлэлээтилэр.
Онтон “Чолбон” лааҕырга 6-9-с кылаас үөрэнээччилэрэ Климентина Винокурова уонна Екатерина Стручкова салайааччылаах туризм эйгэтин дириҥэтэн үөрэттилэр.
Өймөкөөн оскуолатын иһинэн “Чэчир” лааҕыр бастакы сезонугар 1-5-с кылаастартан уопсайа 25 оҕо сырытта. Лааҕыр сүрүн тиэмэтинэн Кыайыы 80 сыла буолла. Манна оҕолор Кыайыыга аналлаах киинэлэри көрдүлэр, герой куораттары үөрэттилэр. Иитээччилэринэн Ольга Борисова уонна Айталина Аммосова үлэлээтилэр. Өймөкөөҥҥө өссө биир лааҕыр от ыйын 5 күнүттэн аанын арыйда. Манна 25 оҕо сылдьар. Лааҕыр от ыйын 29 күнүгэр дылы үлэлиир былааннаах. Оҕолор эмтээх оттору, отоннору хомуйуохтаахтар, сибэккилэри үөрэтиэхтээхтэр.
Уус-Ньара гимназиятын иһинэн “Планета детства” лааҕыр биир сезоҥҥа уопсайа 45 оҕону хабан үлэлээтэ. Лааҕырга араас тэрээһиннэр интэриэһинэйдик аастылар.
Оҕолор лааҕырга биир саастыылаахтарын кытта астына алтыстылар, элбэҕи биллилэр-көрдүлэр.
Бу туһунан сиһилии “Хотугу сардаҥа” хаһыакка ааҕыҥ.
Ольга Скрыбыкина