Абитуриеннар ыстааптарын салайар улуустааҕы Үөрэх управлениетын бэрэстэбиитэлэ, Үчүгэй орто оскуолатын учуутала Анисья Киприянова иһитиннэрбитинэн, Саха сирин үрдүк уонна орто анал үөрэхтэрин кыһаларыгар докумуоннары тутуу бэс ыйын 20 күнүттэн саҕаламмыта.
Өймөкөөн оскуолаларын бүтэрбиттэр үөрэххэ киирэр докумуоннарын Дьокуускайга үлэлиир «Абитуриент-2023» ыстаабыгар туталлар. Маны таһынан абитуриеннар докумуоннарын “Госуслуги” портал нөҥүө эмиэ биэриэхтэрин сөп.
Өймөкөөн улууһугар оскуоланы быйыл 48 үөрэнээччи бүтэрдэ, олор истэригэр Дьокуускай куоракка туттарсааччы – 9, оттон Арассыыйа үрдүк үөрэҕин кыһаларыгар – 14 выпускник.
Эдэр дьон улахан аҥаара инженернэй-техническэй хайысханан үөрэниэхтэрин баҕараллара көһүннэ. Уопсайа үөрэххэ 102 туттарсааччыттан ааспыт сыллааҕы выпускниктар иккиэлэр. 9-с кылаас кэнниттэн 18, 10-с кылааһы бүтэрэн баран икки оҕо араас үөрэх кыһатыгар докумуоннарын биэрдилэр, атыттар өссө быһаарына иликтэр.
— Бүгүҥҥү күҥҥэ 16 абитуриент биһиэхэ сырытта. Онтон 4 эдэр киһи тус сыаллаах үөрэххэ дуогабар түһэристилэр, — диэн кэпсиир Анисья Викторовна. – Үөрэххэ киириэн баҕалаах оҕолор баҕаларын учуоттаан туран, араас барыйааны талабыт. Оҕолор ыстаапка докумуоннарын ыыппыттарын кэннэ, олору тутар хамыыһыйаларга тиксэрэбит. Үөрэххэ туттарсааччы интэриэһиргиир, мунаарар боппуруостарын быһаарыыга үгүс үлэ ыытыллар.
Абитуриент ыстааба киин куоракка Водников уул., 1 дьиэтигэр, уу тырааныспарын институтугар (спортивнай саалаҕа ) 10 чаастан 14 ч. дылы үлэлиирин өссө төгүл санатабыт.
Билсэр төлөпүөн: 89644175678 (ватсаап баар).
Евдокия Егорова