Быйыл сайын абитуриеннар ыстааптарын салайбыт улуустааҕы Үөрэх управлениетын бэрэстэбиитэлэ, Үчүгэй орто оскуолатын учуутала Анисья Киприянова иһитиннэрбитинэн, быйылгы выпускниктарбыт 97,87 % үөрэххэ киирдилэр.
Саха сирин үрдүк уонна орто анал үөрэхтэрин кыһаларыгар докумуоннары тутуу бэс ыйын 20 күнүттэн саҕаламмыта. Онтон абитуриеннар Өймөкөөннөөҕү ыстааптара от ыйын 1 күнүттэн үлэлээбитэ. Улуус үрдүнэн уопсайа 53 выпускник үөрэххэ туттарыста. Онтон алта оҕо 9-с кылаас кэнниттэн, 47 — быйылгы выпускниктар. Улуустан үрдүк үөрэххэ туттарсарга 26, орто үөрэххэ 24 выпускник сайаапка биэрбитэ.
Дьокуускайга үлэлээбит ыстаапка 33 абитуриент тус бэйэтинэн сылдьан көмө ылла, ол иһигэр алта — атын улуустан, тоҕус — ааспыт сыллар выпускниктара. “Госуслуга” портал нөҥүө 27 выпускникка көмө оҥоһулунна. Манна сүрүннээн бу сайт нөҥүө докумуоннары хайдах ыытарга, тус кабинет арыйарга сүбэ-ама биэрэн өйөөтүлэр. Социальнай ситиминэн тустаах иһитиннэриини түргэнник тарҕатар сыаллаах анал батсаап-бөлөх арыллан таһаарыылаахтык үлэлээтэ.
Өймөкөөн улууһуттан биир выпускник тус сыаллаах көрүҥү (целевое) туһанан үөрэххэ киирдэ. Уопсай көрдөрүүнэн улуустан 22 оҕо үрдүк үөрэххэ туттарсан киирдэ, онтон 2-тэ ааспыт сыллар выпускниктара. Маны тэҥэ 28 выпускник орто анал үөрэх кыһатыгар киирдэ, ол иһигэр икки оскуоланы урут бүтэрбиттэр ыччат дьон.
Чуолаан оскуоланы быйыл бүтэрбит 47 выпускниктан үрдүк үөрэххэ 20, орто анал үөрэххэ 26 туттарсан киирэн устудьуон буоллулар, биир оҕо үлэҕэ киирдэ.
— «Абитуриент» ыстаап быйыл сүрүннээн Уу транспорын институтун, Дьокуускайдааҕы гуманитарнай колледжы, Жатайдааҕы техникуму уонна ХИФУ приемнай хамыыһыйатын кытта ыкса сибээстээхтик үлэлээтэ. Бу үөрэх кыһаларын кытта кэлэр өттүгэр идэни сөпкө талыы хайысхатынан (профоориентация) үлэни күүһүрдэргэ былаанныыбыт, — диэн иһитиннэрдэ Анисья Викторовна.
Бу туһунан сиһилии «Хотугу сардаҥа» хаһыакка ааҕаарыҥ.
Ольга Скрыбыкина