РФ сэнээтэрэ Сахамин Афанасьевка өрөспүүбүлүкэ тэрилтэлэрэ, олохтоохторо араас боппуруостары быһаарарыгар көрдөһөллөр. Киирбит боппуруостары тустаах инстанцияларынан быһаарыы – сэнээтэр үлэтин биир сүрүн соруга.
Өймөкөөн улууһуттан Сахамин Афанасьев аатыгар икки суолталаах боппуруос киирбит: Чурапчы уонна Хаандыга учаастактарын икки ардыларынааҕы Р-504 «Халыма» федеральнай суол туругун уонна Томтор нэһилиэгэр элбэх хайысхалаах култуурунай-спортивнай комплекс тутуутун туһунан.
Бастакы боппуруоска РФ сэнээтэрэ Сахамин Афанасьев РФ тырааныспарын миниистиригэр Роман Старовойтка маннык официальнай суругу ыыппыт:
“Ытыктабыллаах Роман Владимирович! Таатта, Томпо уонна Өймөкөөн улуустарын олохтоохторо “Халыма” федеральнай суол Чурапчы уонна Хаандыга учаастактарын икки ардыларынааҕы Р-504 учаастагын туруга мөлтөҕүн туһунан боппуруоһу быһаарарбар көрдөһүү суруктара киирдэ.
“Халыма” федеральнай суол Арассыыйа Уһук Илин уокуругар биир сүрүн хорук трассатынан буолар. Олохтоохтор суол айанныырга табыгаһа суох туруктааҕын, өрөмүөн олох мөлтөхтүк ыытылларын, суолу көннөрөр үлэ ыытыллыбатын бэлиэтииллэр.
Ытыктабыллаах Роман Владимирович, эппиэтинэстээх салайааччы быһыытынан, Р-504 “Халыма” федеральнай трассатын көрүү-истии, ону тэҥэ бу учаастакка туох үлэ ыытылларын, салгыы туох былааннанарын миэхэ сиһилии ырытан быһаараргыт буоллар. Бу туһунан миэхэ уонна сайаапка биэрээччилэргэ суругунан биллэрэргитигэр көрдөһөбүн”.
Сахамин Афанасьев иһитиннэрбитинэн, сэнээтэр официальнай суруга бу күннэргэ РФ тырааныспарын миниистирэ Роман Старовойт быһаарыытыгар сылдьар. Сэнээтэр “эппиэт кэллэҕинэ, улуус хаһыаттарын эрэдээксийэтигэр ыытыам” диэн эттэ.
Иккис боппуруос – Томтор нэһилиэгэр элбэх хайысхалаах култуурунай-спортивнай комплекс тутуута.
Сэнээтэр Сахамин Афанасьев СӨ Бырабыыталыстыбатын Бэрэссэдээтэлэ Кирилл Бычковка маннык ис хоһоонноох суругу ыытта:
“Убаастабыллаах Кирилл Евгеньевич! Мин ааппар “Өймөкөөн улууһа” МТ баһылыгын э.т. С.Н. Можуковаттан Томтор нэһилиэгэр элбэх хайысхалаах култуурунай-спортивнай комплекс тутуутун “Култуура” национальнай бырайыак чэрчитинэн 2025 сылга инвестиционнай бырагыраамаҕа киллэриигэ туһаайыллыбыт официальнай суруга киирдэ. Томтор нэһилиэгэ Өймөкөөн улууһун Тымныы полюһун быһыытынан биллэр аан дойдуга «Өймөкөөн – Тымныы полюһа» туристическай-рекреационнай кластеры сайыннарар туризм киинин быһыытынан биир биллэр-көстөр ураты култуурунай киининэн буолар.
Бу суолталаах боппуруос сөптөөхтүк быһаарылларыгар эрэнэн туран, хоруйун суругунан ыытаргытыгар көрдөһөбүн”.
Сэнээтэр бу официальнай ыйытыгар СӨ Бырабыыталыстыбатын Бэрэссэдээтэлин солбуйааччы Дьулустаан Борисов маннык хоруйу ыытта:
“Томтор нэһилиэгэр элбэх хайысхалаах култуурунай-спортивнай комплекс тутуутун РФ Култуура министиэристибэтин «Култуура» национальнай бырайыагын чэрчитинэн “Тыа сиригэр култуурунай-сынньанар тииптээх тэрилтэлэри тутуу уонна хапытаалынай өрөмүөннээһин” хайысханан сүүмэрдиир куонкуруска сайаапка киллэрэргэ былаанныыбыт. Билиҥҥи туругунан, РФ Култуура министиэристибэтэ куонкуруска сүүмэрдээһин үлэтин саҕалыы илик.
Маныаха эбии, СӨ Култуура уонна духуобунай сайдыы министиэристибэтэ СӨ Экэниэмикэ министиэристибэтин кытта бу эбийиэги СӨ Инвестиционнай бырагырааматыгар киллэрэргэ үлэлэһэр. Эбийиэги үбүлээһин боппуруоһа “2024 сылга уонна былааннаммыт 2025-2026 сылларга СӨ судаарыстыбаннай бүддьүөтүн туһунан” сокуоҥҥа уочараттаах көннөрүүлэри киллэриигэ көрүллүөҕэ”.
Көстөрүн курдук, киирбит ыйытыылар бары РФ сэнээтэрэ Сахамин Афанасьев тус хонтуруолугар сылдьаллар.
Елена Потоцкая