Сэттис төгүлүн ыытыллар “Тымныы Полюһа – Өймөкөөн” экстремальнай марафоҥҥа Арассыыйа араас эрэгийиэннэриттэн, ону тэҥэ Белоруссияттан уонна Японияттан сүүрээччилэр кэлиэхтэрэ.
Быйылгы марафон геолог, географ, ССРС наукаларын Академиятын анал кэрэспэдьиэнэ Сергей Обручев кыттыбыт Индигир экспедициятын 100 сылыгар ананар.
“Тымныы Полюһа – Өймөкөөн” экстремальнай марафон балаһыанньатын быһыытынан спортсменнар Томтор уонна Өймөкөөн нэһилиэктэрин икки ардыларыгар трассаҕа хас даҕаны дистанцияҕа сүүрүөхтэрэ. Тохсунньу 16 күнүгэр 5, 10, 15 уонна 21 км старт бэриллиэҕэ. Онтон сарсын, тохсунньу 17 күнүгэр, саамай уһун дистанциялар – 42 195 км уонна 50 км стартара биллэриллиэҕэ. Ультрамарафоҥҥа – 50 км дистанцияҕа — 24, оттон 42 195 километрга – 27 кыттааччы сүүрүөҕэ. 21 км дистанцияҕа сүүрэргэ – 16, 15 км – 4, 10 км – 13, 5 км – 13 киһиттэн сайаапка киирбитэ.
Марафон кыттыылаахтарын ортолоругар РФ футболга сүүмэрдэммит хамаандатын урукку хапытаана Алексей Смертин баар. Онон футболу сэҥээрээччилэр кумирдарын илэ харахтарынан көрөр кыахтаахтар. Кини ультрамарафоҥҥа кыттар. Оттон японец Мизуки Такахаси 5 км дистанцияҕа сүүрүөҕэ.
Өймөкөөн улууһуттан экстремальнай марафоҥҥа улуус 8 бэрэстэбиитэлэ кыттар: Үчүгэй орто оскуолатын бүтэрбит 49 саастаах урбаанньыт Ольга Винокурова уонна Орто-Балаҕантан 27 саастаах тутааччы, спортсмен Иннокентий Иванов ультрамарафоҥҥа кытталлар; 38 саастаах улуустааҕы дьаһалта эппиэттээх үлэһитэ Павел Березкин — 21 км; 37 саастаах Томтор учаастактааҕы балыыһатын педиатр бырааһа Индилена Местникова, 63 саастаах экстремал айанньыт, марафоҥҥа үс сыл устата ситиһиилээхтик кыттыбыт уопуттаах сүүрүк Семен Баишев, 33 саастаах Томтор орто оскуолатын физкультура учуутала Артем Ефимов — 10 км; 18 саастаах Андрей Кондаков, Никита Неустроев — 5 км сүүрэллэр.
Сүүрүү трассатыгар аналлаах балааккалар туруохтара, экстремаллары медиктэр уонна ЫБММ үлэһиттэрэ арыаллыахтара.
“Тымныы Полюһа – Өймөкөөн” VII экстремальнай марафон түмүгүнэн наҕараадалааһын тохсунньу 17 күнүгэр киэһэ Томтордооҕу Култуура дьиэтигэр ыытыллыаҕа.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина