Былырыын кулун тутар 1 күнүттэн “Сүөһү иитиитин ойоҕос бородуукталарын уонна РФ сорох сокуоннай аакталарыгар уларытыылары киллэрии тустарынан” диэн 248-с №-дээх сокуон, эбэтэр малтаччы эттэххэ, “Балбаах сокуона” күүһүгэр киирбитэ. Ол гынан баран, манна сыһыаннаах хонтуруоллуур тэрилтэлэр сокуон үлэлиир бастакы сылыгар өйдөтөр-сырдатар үлэнэн муҥурданарга быһаарбыттара.
Ити сокуон ирдэбиллэрэ РФ бырабыыталыстыбатын “Сүөһү иитиитин ойоҕос бородуукталарын туһаныыга ирдэбиллэри бигэргэтии туһунан” диэн 1940-с №-дээх уурааҕар ыйыллаллар. Аны бүгүҥҥүттэн, 2024 сыл ыам ыйын 2 күнүттэн, “Административнай быраабы кэһиилэр тустарынан РФ Кодексыгар уларытыылары киллэрии туһунан” диэн 86-с №-дээх федеральнай сокуон күүһүгэр киирдэ. Бу сокуоҥҥа “Административнай кодекс 8.6 ыстатыйатын 2-с чааһыгар балбааҕынан сири киртитии иһин административнай эппиэтинэс туттуллар” диэн эбии киллэрилиннэ.
Онно сурулларынан, ирдэбиллэри кэһии иһин административнай эппиэтинэс ыстараабын кээмэйэ маннык олохтоммут:
– биирдиилээн дьоҥҥо – 3 тыһ. солкуобайтан 5 тыһ. солкуобайга диэри;
– дуоһунастаах дьоҥҥо – 10 тыһ. солкуобайтан 30 тыһ. солкуобайга диэри;
– урбаанньыттарга – 20 тыһ. солкуобайтан 40 тыһ. солкуобайга диэри эбэтэр үлэтэ 90 хонукка тохтотуллар;
– юридическай сирэйдэргэ – 40 тыһ. солкуобайтан 801 тыһ. солкуобайга диэри эбэтэр тэрилтэ үлэтэ 90 хонукка тохтотуллар.
“Балбаах сокуонугар” ыйылларынан, балбааҕы тыа хаһаайыстыбатын сиригэр уоҕурдуу быһыытынан туһаныах иннинэ анал оҥоһуулаах миэстэҕэ ууран-харайан сытыаран курулатан баран, нуормаҕа эппиэттиирин чинчийии түмүгэ бигэргэппитин кэнниттэн туттуллуохтаах.