Соторутааҕыта Дьокуускайга 3-с “Саха сирин атыыһыта” пуорум-дьаарбаҥка уонна 14-с эрэгийиэннэр икки ардыларынааҕы “Якутия ЭКСПО” быыстапка уонна дьаарбаҥка ыытыллыбыта.
Тэрээһин чэрчитинэн ыытыллыбыт Өймөкөөн улууһун аатырбыт 1-кы гильдиялаах меценат атыыһытыгар, Ньукулай Уоһукабыс Кырбаһааҥкыҥҥа аналлаах дьыалабыай уонна култуурунай бырагыраамалар дьон-сэргэ болҕомтотун улаханнык тардыбыттара.
Биир дойдулаахпыт, атыыһыт С.П. Готовцев I-Массака (куортуктаах кинээс) сыдьаана Марианна Заровняева Н.О. Кривошапкин быыстапкатын тэрийэргэ күүс-көмө буолбут дьоҥҥо барҕа махталын тириэрдэр.
Кини онуоха чуолаан быыстапкаҕа тус бибилэтиэкэлэриттэн Өймөкөөн улууһугар уонна Атыыһыкка сыһыаннаах 18 кинигэни уонна Н.О. Кривошапкин ойууламмыт хартыынатын быыстапкаҕа анаан туруорбут Валентина уонна Прокопий Ксенофонтовтары бэлиэтээтэ.
— Кэргэннии Ксенофонтовтар Өймөкөөн улууһун дьиҥнээх патриоттара, бу тэрээһиҥҥэ көхтөөхтүк кытыннылар. Прокопий Николаевич “Атыыһыт” хоһоонуттан быһа тардан аахта. Быыстапкаҕа турбут Ньукулай атыыһыт мэтириэтин кинилэр анал сакааһынан күндү тааһынан Нерюнгри ювелирнай сыаҕар оҥотторбуттар, — диэн сырдатта Марианна Заровняева.
Валентина Михайловна уонна Прокопий Николаевич бу тэрээһиҥҥэ сылдьан үөлээннээхтэрин, атыыһыт сыдьааннарын кытта көрсөн ирэ-хоро кэпсэттилэр, санааларын атастастылар, урбаан ханнык баҕарар түөлбэ кэлимник сайдыытыгар төһүү күүһүнэн буоларын бэлиэтээтилэр.
П.Н. Ксенофонтов бу күн СӨ Атыы-бырамыысалыннай Палататын Махтал суругунан уонна анал бэлиэни үөрүүлээх быһыыга-майгыга тутта.
Пуорумҥа Өймөкөөн улууһун баһылыга А.С. Оконешников Н.О. Кривошапкин кэриэһин үйэтитиигэ аналлаах тэрээһиннэр саҕаламмыттарын, аны икки сылынан Атыыһыт төрөөбүтэ 190 сыла бэлиэтэнэрин санатта.
Бэчээккэ
Любовь КРИВОШАПКИНА
бэлэмнээтэ