2026 сыл дойду бэрэсидьиэнин Владимир Путин ыйааҕынан Арассыыйа Норуоттарын сомоҕолоһууларын сылынан буолар. СӨ Ил Дархана Айсен Николаев Ил Түмэҥҥэ туһаайан этиитигэр 2026 сылы өрөспүүбүлүкэҕэ Култуура сылынан биллэрбитэ.
“Бу саҕалааһыннар бэйэ-бэйэлэрин ситэрсэн биэрэллэр. Биһиги кэскилбит — баай култууралаах уонна устуоруйалаах, айар кыахтаах, күүстээх, элбэх омуктаах, сомоҕолоспут норуоттар кэскиллэрэ», — диэн бэлиэтээбитэ Айсен Николаев.
Өймөкөөн дириҥ устуоруйалаах улууһунан буолар. Манна өбүгэ саҕаттан олохтоммут дьарыктары, норуот үтүө үгэстэрин күн бүгүҥҥээҥҥэ диэри илдьэ сылдьар араас омук дьоно түөлбэлээн олорор. Ол курдук сахалар хороҕор муостааҕы, сыспай сиэллээҕи, эбээннэр табаны иитиинэн дьарыктаналларын 21-с да үйэҕэ сүтэрбэккэ кэллилэр. Тымныы полюһун омугуттан тутулуга суох хас биирдии олохтооҕо төрөөбүт кыраайыгар бэриниилээҕин, норуотун үтүө үгэстэрин илдьэ сылдьарын ааһан, үүнэр көлүөнэ ыччакка иҥэрэр үтүөкэннээх аналлаах.
Оройуон салалтата ону сыаналаан, үүммүт 2026 сылы улууска Култуура уонна үтүө үгэстэр сылларынан биллэрбитэ оруннааҕын бэлиэтиир тоҕоостоох.
Онон маннык дьаһаллар өрөспүүбүлүкэҕэ олорор норуоттар култуураларын уонна үгэстэрин, төрүт омуктар тылларын уонна духуобунай култуураларын харыстааһыҥҥа уонна сайыннарыыга туһуламмыт үлэ күүһүрдэрин кэрэһилиир соруктаахтар.
Любовь Кривошапкина