Убаастабыллаах ааҕааччыларбытыгар 2025 сылга улуустааҕы “Севернай заря” уонна “Хотугу сардаҥа” хаһыаттарга сурутуу ыытылла турарын туһунан өссө төгүл санатабыт. Маны тэҥэ “Почта России” АУо салааларыгар улуус нууччалыы тылынан тахсар “Севернай заря” хаһыатыгар чэпчэтиилээх сурутуу саҕаламмытын туһунан иһитиннэрэбит.
Ол курдук, бу дьыл ахсынньы 2-12 күннэригэр почта салааларыгар “Севернай заря” хаһыакка чэпчэтиилээх сурутуу ыытыллар. Сыаната сылга 1442,95 солк. (сыл аҥаарыгар — 714,54). Аҕа дойду Улуу сэриитин бэтэрээннэрэ, I уонна II группалаах инбэлииттэр хаһыаты биир сылга 1299,32 солк. (сыл аҥаарыгар – 644,10 солк.) сурутуохтарын сөп.
“Хотугу сардаҥа” хаһыаты кытта өр сылларга бииргэ буолан кэлбит общ. корр. Дария Тихомирова уонна Тамара Винокурова улуус соҕотох сахалыы тыллаах “Хотугу сардаҥа” хаһыат сурутааччытын ахсаана элбиирин туһугар дууһаларынан ыалдьар буолан, бу туһунан бэйэлэрин санааларын хаһыакка өрүүтүн суруйаллар.
Тыа сиригэр эрэллээх, бастайааннай сурутааччыбыт элбэх. Бу – сүрүннээн орто көлүөнэ уонна аҕам саастаах дьон. Кинилэр кэлэр сылга хаһыаттарыгар суруйтарыахтара диэн эрэллээхпит.
Хомойуох иһин, үөрэхтээһин, доруобуйа харыстабылын курдук сүрүн эйгэлэр тэрилтэлэрин үлэһиттэрэ улуус хаһыаттарыгар сурутуулара мөлтөҕүн туһунан бэлиэтээһин баар суол. Улуус дьоно ыал, тэрилтэ аайы суруйтаран, кумааҕы хаһыат үйэтин уһатарга төһүү күүс буолуо этилэр.
Онон, муниципалитеттар баһылыктарын, тэрилтэлэр салайааччыларын, эппиэттээх үлэһиттэри бу боппуруоска болҕомтону ууралларыгар өссө төгүл ыҥырабыт.
- БОЛҔОЙУҤ, “БЭТЭРЭЭНИ СУРУЙТАР” ААХСЫЙА!
Аахсыйа чэрчитинэн улуустааҕы “Севернай заря”-“Хотугу сардаҥа” хаһыаттарга тыыл бэтэрээннэрин уонна сэрии сылын оҕолоро статустаах ытык кырдьаҕастары 2025 сылга суруйтараргытыгар ыҥырабыт.
“ Бэтэрээни суруйтар ” аахсыйа 2025 сылга бэлиэтэнэр Улуу Кыайыы 80 сылыгар уонна “Севернай заря” хаһыат төрүттэммитэ 80 сыллаах үбүлүөйүгэр ананар.
УЛУУС ХАҺЫАТТАРЫН ЭРЭДЭЭКСИЙЭҔЭ СУРУТУУ СЫАНАТА:
“Севернай заря”: 1 сылга — 1122 солк., 6 ыйга – 561 солк., 1 ыйга – 94 солк.
“Хотугу сардаҥа ”: 1 сылга — 805 солк., 6 ыйга – 403 солк., 1 ыйга – 67 солк.
ЭРЭДЭЭКСИЙЭ ЭРЭЛЛЭЭХ КӨМӨЛӨҺӨӨЧЧҮЛЭРЭ
Улуус хаһыаттарын альтернативнай сурутуутун тэрийиигэ хас нэһилиэк аайы баар көмөлөһөөччүлэрбит үлэлэһэн кэллилэр. Биһиги кинилэргэ махталбыт муҥура суох.
Өймөкөөн нэһилиэгэр – Агафья Готовцева; Томторго – Надежда Литвинцева; Сордоҥнооххо – Мария Никифорова; Үчүгэйгэ – Наталья Громова; Төрүккэ – Нина Чачуа.
Көмөлөһөөччүлэрбит сыралаах үлэлэриттэн быыс булан сурутууну тэрийэллэрэ махталлаах дьыала. Бу дьоммут бары биһиги уопсастыбаннай кэрэспэдьиэннэрбит буолаллар. Кинилэр бу күннэргэ номнуо дьоннорун-сэргэлэрин хаһыаттарга суруйтарыыларын көҕүлээн, испииһэктэрэ хаҥаан иһэр. Холобур, Өймөкөөн нэһилиэгэр Агафья Готовцева испииһэгэр ахсынньы 29 күнүнээҕи туругунан 33 сурутааччы киирэ сылдьар. Сордоҥноох нэһилиэгэр “Хотугу сардаҥаны” 15, “Севернай заряны” 3 киһи суруйтарда. Төрүт нэһилиэгэ – “ХС” – 29, “СЗ” – 7; Томтор — “ХС” – 13, “СЗ” – 6 сурутааччыланна.
Бу испииһэк өссө хаҥаан, үүнэр сылы элбэх сурутааччылаах көрсүөхпүт диэн эрэнэбит. Сурутуу хаамыытын туһунан ааҕааччыларбытыгар иһитиннэрэ туруохпут.
Любовь Кривошапкина
Сурутуу боппуруостарынан 8(41154)2-25-27 – реклама менеджерэ биитэр 89142996098, 89841193166 төл. эрийэн билсиҥ.
Эрэдээксийэ электроннай аадырыһа: severnayazarya@mail.ru