Ол курдук биһиги биир дойдулаахтарбыт, Үчүгэй нэһилиэгин Далбар хотуннара соторутааҕыта Санкт-Петербурга «Саха сирин хаар оһуордара» диэн ХI-с төгүлүн ыытыллар Бүтүн Арассыыйатааҕы декоративнай-прикладной ускуустуба быыстапкатыгар кытыннылар.
— Бу тэрээһиҥҥэ мин айылҕаттан талааннаах, айар-тутар айылгылаах уран тарбахтаах иистэнньэҥнэр Сардаана Громованы уонна Октябрина Охлопкованы кытта баран кыттан кэллим, — диэн Мария Винокурова сэһэргээтэ. – Манна Сардаана Николаевна сарыы, Октябрина Охлопкова өрүү куукулаларынан уонна мин сылгы түүтүттэн оҥоһуктарбытынан (сухое валяние) үлэлэрбитинэн кытынныбыт.
Бастакы күн быыстапкабыт үөрүүлээх арыллыыта Арассыыйа этнографиятын түмэлин мраморнай саалатыгар буолбута. Оттон «Буревестник» социальнай-култуурунай кииҥҥэ көрдөрүллүбүтэ. Бу күн дьүүллүүр сүбэ түмүк таһааран, кыайыылаахтары эҕэрдэлээн, үөрүүлээх быһыыга-майгыга дипломнары уонна кубоктары туттарбыта. Биһиги үһүөн бэйэбит көрүҥнэрбитигэр «Бастыҥ маастар» үрдүк аатын сүктүбүт.
А.И. Герцен аатынан Хотугу норуоттар институттарыгар устудьуоннары уонна учууталлары, норуот үгэстэрин илдьэ сылдьааччылары кытта Өймөкөөн, Усуйаана, Эдьигээн, Чурапчы улуустарыттан, Дьокуускайтан уонна Ленинград уобалаһыттан маастардары уонна кинилэр экспонаттарын көрүү буолбута.
Үс күн устата быыстапкаҕа элбэх көрөөччү сырытта. Манна кэлбит дьон-сэргэ үлэлэрбитин сэҥээрэ көрдө, үрдүк сыаналыбы биэрэн санаабытын кынаттаата. Тэрээһин Арассыыйа норуоттарын баай уонна араас култууратын, аныгы үйэҕэ бу ураты үгэстэри үйэтитии, сайыннарыы улахан суолталааҕын өссө төгүл көрдөрдө.
Маннык эриэккэс күрэҕи иилээн-саҕалаан тэрийэр «Северная радуга» култуураны сайыннарар АНО дириэктэрэ, РФ Бэрэсидьиэнин иhинэн СӨ бастайааннай бэрэстэбиитэлистибэтин бэрэссэдээтэлин солбуйааччы, «Лидер народной дипломатии» Аан дойдутааҕы куонкурус лауреата Александра Васильевна Борисоваҕа (биһигин кытта иккис хаартыскаҕа) махталбын тиэрдиэм этэ. Кини мин үлэлэрбин таба көрөн, сыаналаан миигин күрэххэ бэйэтинэн ыҥырбыта. Маннык үрдүк таһымҥа таһаарбытыгар сиртэн халлааҥҥа тиийэ сүгүрүйэбин. — Баҕарабын Александра Васильевнаҕа уонна кинини кытта тэҥҥэ үлэлэспит хамаандатыгар, дьүүллүүр сүбэҕэ чэгиэн туругу, үлэлэригэр өссө үрдүк чыпчааллары, дьолу-соргуну! – диэн кэпсээнин түмүктээтэ улуус норуот маастара Мария Винокурова.
Евдокия Егорова