Дьокуускайга үлэлиир “Абитуриент -2025” ыстаап салайааччыта Анисья Киприянова үөрэххэ туттарсыы хаамыытын туһунан иһитиннэрбитинэн, Өймөкөөн улууһуттан 11-с кылаас кэнниттэн орто анал үөрэххэ 22 оҕо докумуонун туттарда.
Киин үөрэх кыһаларыгар – 15 оҕо сайаапкаларын ыыттылар. Үрдүк үөрэх кыһатыгар өрөспүүбүлүкэҕэ 7, киин куораттарга 8 выпускник үөрэниэн баҕалааҕын биллэрдилэр.
Оттон 9-с кылаас кэнниттэн 26 оҕо устудьуон буоларга быһаарынна.
Ааспыт сыллааҕы выпускниктартан ХИФУ-га биир ыччат орто үөрэх кэнниттэн киирдэ. Итиэннэ биир оҕо үөрэҕин уларытта.
Быйыл Өймөкөөн абитуриеннара сүрүннээн мэдиссиинэ (сиэстэрэ) хайысхаларын таллылар. Атырдьах ыйын 20 күнүн кэнниттэн бүддьүөт миэстэтигэр кыайан ааспатахтар төлөбүрдээх үөрэххэ киириэхтэрин сөп.
Манна даҕатан эттэххэ, саха атын аан дойдуга аатырдыбыт удьуор сылгыһыт, экстремал айанньыт, Бүтүн Арассыыйатааҕы «Дальний Восток – Земля приключений» күрэх бастакы сезонун финалиһа, биир дойдулаахпыт Дугуйдаан Винокуров бу күннэргэ Арктикатааҕы судаарыстыбаннай агротехнологическай университет Өктөмнөөҕү филиалыгар «Агрономия» хайысхаҕа «Агроном» үөрэҕэр киирэргэ докумуоннарын биэрдэ.
Бу туһунан “Хотугу сардаҥа” хаһыакка ааҕыҥ.
Евдокия Егорова