Муус устар иккис баскыһыанньатыгар Саха сиригэр Уол оҕо күнэ бэлиэтэнэр.
Уол оҕо — норуот кэскилэ. “Уол оҕо төрөөтөҕүнэ суор үөрэр” диэн саха өһүн хоһооно элбэҕи этэр. Уол оҕо бу орто дойдуга кэлбит анала эр киһи килбиэннээҕэ буолан улаатан, алаһа дьиэни тэринии, саха удьуорун элбэтии, тэнитии буолар. Хас биирдии дьиэ кэргэн уолаттарын дьиҥнээх эр киһи буолан, улаатан тахсалларыгар кыһаллан-такайан үөрэтэр.
Ийэ уонна аҕа уол оҕо иитиитиигэр туспа көрүүлээхтэр, сүрүн сыаллаахтар. Бүгүн уол оҕо иитиитигэр сүрүн болҕомтону туохха ууралларын кэпсиэхтэрэ биһиги улууспут дьиэ кэргэттэрэ, ыал ийэлэрэ, аҕалара:
Варвара ДЬЯКОНОВА, Төрүт:
— Биһиги дьиэ кэргэн 3 уол оҕолоохпут, улахаммыт Вадим 8 кылааска үөрэнэр, Айар-Хаан 7 саастаах, кырачааммыт Эр-Бэрт 4 саастаах. Уол оҕону иитиигэ сүрүн болҕомтону айылҕаны кытта сибээскэ уурабыт. Тоҕо диэтэр, хас биирдии саха киһитэ айылҕаны кытта ыкса ситимнээх. Уол оҕо аҕаны кытта чугас буолуохтаах дии саныыбыт. Биһиги аҕабыт уолаттарын бэйэтин кытта куруук илдьэ сылдьар, бултуурга, уһанарга, ас астыырга кыра эрдэхтэриттэн үөрэтэр. Уолаттарбыт ырыа-үҥкүү уонна хайыһар куруһуоктарыгар сөбүлээн дьарыктаналлар. Айылҕаҕа тахсан сынньанарбытын туохтааҕар да ордоробут. Иллэҥ кэммитигэр бары бииргэ дуобаттыыбыт. Истиҥ, чугас сыһыан баар буолуохтаах. Оҕолорбутун кытта куруук кэпсэтэбит, кинилэр санааларын истэбит. Туох эмит ыарахаттар баар буоллахтарына, ону бииргэ олорон ырытабыт.
Павел БЕРЕЗКИН, Уус-Ньара:
— Биһиги дьиэ кэргэн икки уоллаахпыт. Улахаммыт Витя 5 кылааска, кырабыт Кирилл 3-кэ ситиһиилээхтик үөрэнэллэр. Үөрэхтэрин өрө тутабыт, эт-хаан өттүнэн чэбдик, айылҕаны кытта чугас буолалларыгар, бары өттүнэн сайдыылаах буола улааталларыгар дьулуһабыт. Хас биирдии уол оҕоҕо аҕата тыыннаах холобур буолар. Ол иһин, тылбынан эрэ буолбакка, бэйэм сыһыаммынан, дьыаланан холобур көрдөрөргө дьулуһабын. Уолаттарбын бэйэбин кытта илдьэ сылдьабын, булт буоллун, отон буоллун. Уолаттарым ГТО кыһыл көмүс мэтээллэрин хаһаайыннара, тустуунан сөбүлээн дьарыктаналлар, саахымакка оонньууллар. Иллэҥ кэммитин дьиэ кэргэнинэн айылҕаҕа атаарарбытын сөбүлүүбүт.
Уол оҕону иитии туһунан төрөппүттэр санааларын «Хотугу сардаҥа» хаһыакка ааҕыҥ.
Ольга Скрыбыкина