Бу күннэргэ Дьокуускайга Өймөкөөн улууһун салалтата министиэристибэлэр уонна бөдөҥ биэдэмистибэлэр салайааччыларын кытта көрсөр.
Быйыл улуус устуоруйатыгар аан бастаан оройуон дьаһалтатын баһылыга Александр Оконешников уонна улуус киинин Уус-Ньара муниципальнай тэриллиитин баһылыга Виктория Понамарчук биир сүбэнэн холбоһон, социальнай сайдыыга туһаайыллыбыт боппуруостары быһаараллар.
— Сэтинньигэ улуус нэһилиэктэринэн, рабочай бөһүөлэктэринн сылдьан, олохтоохтору кытта көрсөн, кинилэр санааларын, этиилэрин истэн, анал боротокуолга сүрүн боппуруостары киллэрбиппит. Ол сүнньүнэн миниистирдэри, бөдөҥ биэдэмистибэлэр салайааччыларын кытта сирэй көрсөн, быһаарыыны эрэйэр боппуруостарга үлэлэстибит. Ол курдук, тырааныспар миниистирэ Владимир Сивцевы кытта тыа сирин улуустарын суолларын, Сунтаар уонна Агайакаан үрэхтэри туоруур тимир муосталары тутуу бырайыактарын оҥорууга, Уус-Ньара уулуссаларын аспааллааһыны кэпсэттибит.
ОДьКХ миниистирэ Вячеслав Емельяновтыын Уус-Ньаратааҕы «Квартальнай» хочуолунайы саҥардан тутууну дьүүллэстибит. Култуура миниистирэ Афанасий Ноевы кытта улуус киинигэр «Металлург» Култуура дьиэтигэр хапытаалынай өрөмүөнү ыытыыны сүбэлэстибит. Аны Арктика сайдыытын уонна хотугу норуоттар дьыалаларын министиэристибэтин миниистирэ Владимир Черноградскайы уонна урбаан миниистирэ Тимур Хандыны кытта көрсөн кэккэ боппуруостары дьүүллэһиэхпит, — диэн санаатын үллэһиннэ баһылык Александр Оконешников.
Баһылыктар оробуочай сырыыларын сиһилии улуус хаһыаттарын кэлэр нүөмэрдэригэр сырдатыахпыт.
Өймөкөөн улууһун дьаһалтатын пресс-сулууспата