Өймөкөөн улууһун Томтор нэһилиэгин музейдара өрөгөйдөөх Кыайыы 80 күнүн көрсө уонна ыччаты патриотическай иитиигэ туһуламмыт былааннарын туһунан маннык үллэһиннилэр.
Айталина ИВАНОВА, Томтордооҕу Н.М. Заболоцкай аатынан кыраайы үөрэтэр түмэл дириэктэрэ:
— Билигин биһиэхэ быыстапкалары саҥардыы үлэтэ ыытылла турар. Күүстээхтик военкоматы уонна архыыбы кытта үлэлиибит, ол курдук, тохсунньу ыйтан сэрии кэмигэр сураҕа суох сүппүт биир дойдулаахтарбыт тустарынан матырыйааллары көрдүү сылдьабыт. Билиҥҥи туругунан сэрии кыттыылааҕын Ермолаев Михаил Афанасьевич туһунан эбии дааннайы буллубут. Уонна «Сэрии оҕолоро» диэн экспозицияны бэлэмнии сылдьабыт.
Муус устар бүтүүтэ “Дойдум дьоно — сэрии оҕолоро” диэн музей бырайыагын чэрчитинэн бастакы лааҕырбыт аһыллаары турар. Лааҕыр сүрүн сыала диэн — сэрии кэминээҕи сыллары ахтан-санаан ааһан видеоҕа тиһии, интервью хомуйуу, ону таһынан сылын аайы ыытыллар «Кыайыы вальса” диэн аан дойдутааҕы акцияҕа кыттыахтаахпыт, Кыайыы ырыаларын үөрэтиэхтээхпит.
Любовь БЕРЕЗКИНА, Н.М. Заболоцкай аатынан Томтор орто оскуолатын иһинэн литературнай-кыраайы үөрэтэр түмэл салайааччыта:
— Томтор орто оскуолатын иһинэн үлэлир литературнай-кыраайы үөрэтэр түмэлгэ үөрэнээччилэр ортолоругар патриотическай өйү-санааны кыра саастарыттан иитии уонна иҥэрии, духуобунай сайдыы, чинчийии үлэтэ барарыгар сүрүн тосхолунан буолар. Тохсунньуга Саха сиригэр Ийэ дойдуну көмүскээччи, Арассыыйаҕа — Аҕа дойдуну көмүскээччи сылларын үрдүк таһымнаахтык арыйбыппыт. Бу тэрээһиҥҥэ күндү ыалдьыттарынан бэтэрээннэр — кырдьаҕастар, сэрии оҕолоро буолбуттара. Кинилэргэ анаан музейга экскурсия тэрийбиппит, оскуолабыт түмэлин актыыбыстара уонна Кыайыы волонтердара хоһоон ааҕан тэрээһиммитин киэргэппиттэрэ.
Түмэлбитигэр өрөгөйдөөх Кыайыы 80 сылын көрсө быыстапкалар, стендэлэр турдулар. Ону таһынан, үөрэнээччилэрбит чинчийии, көрдөөһүн үлэтин ыыталлар. Ордук пааматынньыктар, историческай суолталаах сирдэр тустарынан чинчийии үлэтэ барар.
Сыл аайы оскуолабыт үөрэнээччилэрэ субуотунньугунан нэһилиэкпит пааматынньыктарын, сквердэрин хаартан ыраастыыллар.
Быйыл Кыайыы 80 сылын көрсө хас биирдии кылаас сэрии бэтэрээннэрин, сэрии оҕолорун туһунан альбом эбэтэр буклет хомуйан, тиһэн оҥоруохтаахтар. Ити курдук патриотическай хабааннаах үлэ тиһигин быспакка салҕанан барар.
Ольга СКРЫБЫКИНА
Матырыйаалы сиһилии «Хотугу сардаҥа» хаһыакка ааҕыҥ.