Бу дьыл балаҕан ыйын 27 күнүгэр, Судаарыстыбаннас күнүгэр, “Өймөкөөн улууһа” МТ дьаһалтатын баһылыгынан быыбардааччы 71,29 бырыһыан куолаһын ылан талыллыбыт Александр Оконешников дуоһунаһыгар киириитин сиэрэ-туома ыытылынна.
Баһылык инаугурациятын бочуоттаах ыалдьытынан СӨ Физическэй култуураҕа уонна успуорка миниистирэ Леонид Спиридонов буолла.
Бу күн улуус киинин “Металлург” КДь ыытыллыбыт тэрээһиҥҥэ олохтоох салайыныы уорганын бэрэстэбиитэллэрэ, дьокутааттар, муниципальнай тэриллиилэр баһылыктара, улуус тэрилтэлэрин салайааччылара, уопсастыбаннас уонна улуус олохтоохторо муһуннулар.
Александр Оконешников “Өймөкөөн улууһа” МТ баһылыгынан талыллыбытын туһунан быһаарыыны билиһиннэрэргэ уонна ону туоһулуур дастабырыанньаны туттарарга сценаҕа Өймөкөөн улууһунааҕы территориальнай быыбардыыр хамыыһыйа бэрэссэдээтэлин солбуйааччы Инга Зеленкова, “Өймөкөөн улууһа” МТ дьокутааттар муниципальнай Сэбиэттэрин бэрэссэдээтэлэ Дина Фасхутдинова ыҥырылыннылар.
Ол кэнниттэн оройуон саҥа баһылыга Александр Оконешников улуус сайдыытын туһугар чиэһинэйдик уонна үтүө суобастаахтык үлэлиэм диэн андаҕайда.
Оттон баһылык церемониальнай бэлиэтин кэтэрдэр чиэс үлэ бэтэрээнигэр, Өймөкөөн улууһун Бочуоттаах олохтооҕор, СӨ култуура үтүөлээх үлэһитигэр Роза Ивановна Готовцеваҕа тигистэ.
Успуорт миниистирэ Леонид Спиридонов Ил Дархан Айсен Николаев эҕэрдэ тылын үөрүүлээх быһыыга-майгыга ааҕан иһитиннэрдэ уонна киниэхэ хотугу сир дьонун-сэргэтин туруктаах олоҕун туһугар таһаарыылаахтык үлэлииригэр-хамсыырыгар ситиһиилэри баҕарда.
Любовь Кривошапкина