Сыл-хонук ааһара түргэн даҕаны. “Хотугу сардаҥа” хаһыат бастакы нүөмэрэ тахсыбыта номнуо 35 сыл буолбут.
Улахан уларыйыылаах, бутуурдаах 1990-с сыллар саҕаланыыларыгар мин үлэлиир тэрилтэбин — ветеринарнай сулууспаны биир тиһигинэн үлэлиир сулууспаҕа уларыта иликтэринэ улуус исполкомугар киирсэрбит.
Исполком бэрэссэдээтэлигэр киирэргэ өрүү уочараттаах буолааччы. Мин уһун уочаракка олорон Сергей Егоровы элбэхтэ көрсөрүм. Саха дьоно буолан туох наадаҕа, кыһалҕаҕа кыһарыйтаран кэлбиппитин кэпсэтэрбит. Нууччалыы таттарыылаах дьүһүннээх киһи уу сахалыы сайа саҥаран, сахалыы хаһыаты таһааттараары сылдьарыттан сөхпүтүм. Ол тоҕо? Ити кэмҥэ улууспутугар саха ахсаана баһыйтарар аҕыйаҕа. Оттон Уус-Ньараҕа тарбахха баттанар саха ыала баара, эдэрдэр сахалыы олох даҕаны билбэттэрэ. Онон даҕаны буолуо, улуус киинигэр өрөспүүбүлүкэ сахалыы хаһыаттарын, сурунаалларын суруйтарааччы суоҕун да кэриэтэ этэ.
Мин сахалыы тыллаах “Хотугу сардаҥа” хаһыаты суруйтарар буолан, улуус ыччатын Сергей Егоров суруйууларын сэҥээрдиннэр, өрөспүүбүлүкэбит сонуннарын биллиннэр диэн бириэмэ тосхойдоҕуна, хаһыаты үлэбэр дорҕоонноохтук ааҕар этим, нууччаларбытыгар тылбаастаан биэрэрим.
Сергей Егоров бутуурдаах, эриирдээх-мускуурдаах эрэ буолбакка, дойдубут үрдүнэн экэнэмиичэскэй саахалланыы кэмигэр бэрт улаханнык туруулаһан, санаатын ууран, сыратын-сылбатын биэрэн, улууспут хаһыатын сахалыы тыыннаабыта. Бу — улахан үлэ түмүгэ. Күн бүгүҥҥэ дылы ситимин быспакка хаһыаппыт тахса турара, биһигини, сахалыы саҥалаах дьону, үөрдэр.
“Хотугу сардаҥабыт” ситимин быспакка бар дьонугар күннэтэ үөрүүнү бэлэхтии турдун диэн туран баҕа санаабын лиирик-бэйиэт В.И. Босиков-Баһылай Босяк тылларынан түмүктүөхпүн баҕарабын.
Мин күүстээхпин ийэ тылбынан,
Аалы көтөҕөр алгыспынан,
Өбүгэлэртэн силис тардан
Тыыннаах кэлбит үгэспинэн!
Бу туһунан “Хотугу сардаҥа” хаһыакка ааҕыҥ.
Марианна Таркова, 1991-2014 сс. Өймөкөөн улууһун ветеринарнай- чинчийэр лабораториятын дириэктэрэ, биологическэй билим хандьыдаата, Томтор