Бу күннэргэ улуустааҕы дьаһалта «Өймөкөөн улууһа» муниципальнай оройуон инфраструктура сайдыытын тэрийии, быраабы хааччыйыы сулууспатын салайааччытынан Василий Поскачин ананна.
Бу дуоһунаска ананыан иннинэ Василий Григорьевич Анаабыр улууһун баһылыгынан үлэлээбит.
– Үлэбит сүрүн соруга – биир үлэ хамаандатын тэрийии уонна чопчу сыалы-соругу туруоран былааннаахтык үлэлээһин, — диэн бэлиэтээтэ Василий Поскачин.
– Үлэм бастакы командировкатынан Төрүт нэһилиэгэр сырыы буолла. Онно баран иһэн Өймөкөөн улууһа олус кэрэ айылҕалааҕын сөҕө көрдүм. Киһини бэйэтигэр тардар күүстээх ураты дойду эбит.
Сүрүн соругум – уһун ардах кэмигэр хайа уута сууйан кэбиһэр суолун көрүү-истии, нэһилиэк социальнай эбийиэктэрин туругун кытта билсии. Төрүт суола кыһын таас чоҕу тиэйиигэ эрэ ананан оҥоһуллубут суол. Ол эрээри төрүттэр бу суолунан сылы төгүрүчү сылдьаллар. Буолумуна, «Халыма» федеральнай суолугар быһа киирии буолан, олус табыгастаах. Онон олохтоохтор сылы эргиччи сылдьар суол статуһугар киллэрэр туһунан туруорсуулара оруннаах. Улуус салалтатын кытта бу боппуроска олохтоохтук үлэлэһиэхпит. Бу күннэргэ Төрүт суолун оҥорууга аукцион ыытан, сир тоҥуон иннинэ суолу куттарыахпыт. Социальнай эбийиэктэр туруктара этэҥҥэлэр, салайааччылар тэрилтэлэрин олус тупсаҕайдык тутан, көрөн-истэн, өрөмүөннээн, быйылгы кыстыкка бэлэмнээх киирбиттэрин бэлиэтии көрдүм, — диэн кэпсэтиибитин түмүктээтэ саҥа салайааччы бастакы командировкатыгар сылдьан баран.
Өймөкөөн улууһун пресс-сулууспата