Улуу бөлүһүөк бэйиэт «Ааттыаҕа миигин бары манна баар омук» диэбитинии, соторутааҕыта С.М. Егоров аатынан Төрүт нэһилиэгин бибилэтиэкэтигэр А.С. Пушкин үбүлүөйдээх 225 сылыгар аналлаах литературнай аахсыйа тэрилиннэ.
Бу литературнай тэрээһиҥҥэ таптыыр бэйиэппит хоһооннорун уус-уран ааҕыыга сааһыттан тутулуга суох бары баҕалаах нэһилиэк олохтоохторо кытыннылар.
Кыттааччылар улуус А.С. Пушкиҥҥа сүгүрүйэллэрин бэлиэтигэр «У Лукоморья дуб зеленый», «Няне», «Зимняя дорога», «Узник», «Туча», «К Чаадаеву», «Зимний вечер», «Я помню чудное мгновенье» о.д.а. хоһооннору нууччалыы, сахалыы аахтылар.
Александр Пушкин «Я помню чудное мгновенье» диэн биллиилээх лирическэй хоһоонун саха норуодунай суруйааччыта Наталья Михалева-Сайа «Өйдүүгүн ол мүччү түгэни» диэн аатынан сахалыы тылбаастаабытын Төрүттээҕи оҕо уһуйаанын сиэстэрэтэ, бэтэрээн-үлэһит Клавдия Ефремова мустубут дьоҥҥо ааҕан иһитиннэрдэ.
Тэрээһиммитигэр саамай актыыбынай кыттыыны «Чэчир» оҕо уһуйаанын кэлэктиибэ (сал. Уруйдаана Егорова) ылла, итиэннэ оскуола оҕолоро эмиэ көхтөөхтүк кытыннылар.
Онтон тэрийээччилэр сүргэбит көтөҕүлүннэ, бибилэтиэкэ ааҕааччылардыын ситимнээхтик үлэлиирэ өссө төгүл көһүннэ. А.С. Пушкиҥҥа ананан ыытыллыбыт литературнай дьаһалбыт ураты истиҥник, дириҥ ис хоһоонноохтук ааста. Кырдьыга да улуу бэйиэт айымньылара икки сүүстэн тахса сыллар усталарыгар тыыннаахтарын, аныгы кэм дьонун, ыччатын-оҕотун сэҥээриитин ыларын, умсугутарын кэрэһилээтэ диэм этэ.
Бу литературнай аахсыйаҕа кыттыбыт дьон аны улууска биллэриллибит «Читаем Пушкина» диэн куонкуруска кыттыахтара. А.С. Пушкин хоһооннорун уостан түһэрбэккэ ааҕа сылдьар ааҕааччыларбар барҕа махталбын тиэрдэбин.
Нина Чачуа,
бибилэтиэкэр, Төрүт