Өймөкөөн улууһун аатыттан кыттыбыт 8 сүүрээччи бука бары бэйэлэрин саастарынан категорияларга бастакы, иккис миэстэлэри ылары ситистилэр. Бу – марафон устуоруйатыгар сонун көстүү буолла.
Кинилэртэн саамай уопуттаахтара – туризм эйгэтигэр бэйэтин суолун тобулбут экстремал-айанньыт, сатыы, атынан, уунан походтарга элбэх туриһы сатабыллаахтык салайан сырыттыннарбыт 63 саастаах Семен Баишев буолар.
Семен Баишев санаатын маннык үллэһиннэ:
-Мин марафоҥҥа 10 км ырааҕы 1 чаас 13 сөк. сүүрэн кэлбитим. Саха сирин үрдүнэн ыытыллар марафоннарга мэлдьи кыттабын.
Кыһыҥҥы сүүрүү үрдүк таһымнаахтык ааста. Быйыл Өймөкөөнтөн 8 киһи кыттыбыта хайҕаллаах. Быйылгы марафоҥҥа эдэрдэр кыттыбыттара олус үчүгэй диэн билиэтиэм этэ. Кинилэр күүстээхтик бэлэмнэммиттэрэ үтүө түмүктэри аҕалла.
“Тымныы полюһа — Өймөкөөн” экстремальнай марафон аан дойдуга тиийэ биллэр-көстөр ураты, туспа дьаһал. Онон салҕыы даҕаны Өймөкөөнү аар-саарга ааттатар уонна маассабай успуорду өрө тутар саҥа ааттар биллэн-көстөн иһиэхтэрэ турдаҕа.
Мин нэһилиэк баһылыктара, эппиэттээх үлэһиттэрэ успуорт эйгэтигэр өссө элбэх дьону, ыччаты түмэн, күүстээх үлэни ыытыахтара диэн эрэнэбин.
Оттон саҥа саҕалаабыт марафонецтарга 5 км дистанцияҕа Томтор нэһилиэгин эдэр сүүрээччилэрэ кыайыыны ситиһэн, дьоннорун-сэргэлэрин олус үөртүлэр. Ол курдук бу дистанцияҕа бастакы миэстэни Никита Неустроев ылла. Киниттэн олох аҕыйах сөкүүндэнэн хаалан, Андрей Кондаков биэтэккэ иккис сүүрэн кэллэ.
10 км уһуннаах дистанцияҕа Томтор орто оскуолатын физкультура учуутала Артем Ефимов 1-кы миэстэни ылбыта. Полумарафоҥҥа – 21 км 100 м дистанцияҕа улуустааҕы дьаһалта эппиэттээх үлэһитэ Павел Березкин 36-40 саастаах дьоҥҥо 2-с бириистээх миэстэни ылары ситистэ.
Ультрамарафоҥҥа (50 км) Өймөкөөн улууһун икки бэрэстэбиитэлэ кытынна: Ольга Винокурова уонна Иннокентий Иванов.
Ольга Винокурова төрөөбүт дойдутугар кэлэн кыһыҥҥы марафоҥҥа кыттыбытын туһунан маннык сырдатта:
— Дойдубар сылдьыбатаҕым ырааппыт да эбит. Оҕо сааһым ааспыт сиригэр – Үчүгэй нэһилиэгэр тиийэн бииргэ үөрэммит оҕолорбун, биир дойдулаахтарбын кытта истиҥник көрүстүм. Чысхаан тымныылаах дойдубар аан бастакыбын марафоҥҥа кытынным. Өймөкөөнтөн Томторго сүүрэн кэлэргэ тахсыылаах буолан, уустуктардаах этэ. Ол да буоллар сорукпун толорон, Саха сирин чэпчэки атлетикаҕа успуорт маастара Полина Слободчикова кэнниттэн иккис сүүрэн кэлбитим тус бэйэбэр улахан ситиһии. Бу сүүрүүбүн, бириистээх миэстэни ылбыт үөрүүбүн чугас дьоммор, биир дойдулаахтарбар аныыбын. Маны тэҥэ тириэньэрбэр, Арассыыйаҕа биллэр-көстөр марафонец Татьяна Жирковаҕа барҕа махталбын тиэрдэбин.
Иннокентий Иванов, Сордоҥноох:
— Мин бу кыһыҥҥы марафоҥҥа бастакы холонуум буолар. Бастаан марафон туһунан куйаар ситимигэр көрбүтүм, онтон Евгений Кривошапкиҥҥа тахсан туоһулаһан баран, кыттарга санаммытым. Алтынньыттан дьарыктанан саҕалаабытым. Успуорка сыһыаннаахпын диэххэ сөп, оскуолаҕа үөрэнэ сылдьан сүүрүүнэн, баскетболунан, волейболунан, хотугу многоборьенан дьарыктаммытым.
50 км дистанцияҕа 25 кыттааччыттан 8-с миэстэ буоллум. Куһаҕана суох көрдөрүү дии саныыбын. 5 ч 12 мүнүүтүнэн фиништаатым. Билэр трассам буолан син чэпчэки этэ, ол эрээри, халтараан сирдэр бааллара. Сылаас күн-дьыл туран үөртэ. Уопуттаах, ааттаах-суоллаах дьону кытта сүүрэр миэхэ олус долгутуулаах этэ. Элбэҕи биллим-көрдүм. Эһиил өссө дьаныардаахтык оҥостон сүүрүөм диэн толкуйданным. Түгэнинэн туһанан, миигин өйөөбүт дьоммор барҕа махталбын тиэрдэбин.
Бу туһунан сиһилии “Хотугу сардаҥа” хаһыакка ааҕыҥ.
Биһиги корр.